নিউজ ডেস্ক, 13 আগষ্ট : কাশ্মীৰত চলি থকা নিৰাপত্তা বাহিনীৰ সন্ত্ৰাসবাদ বিৰোধী অভিযানত বিশেষ সফলতা ৷ নিৰাপত্তা বাহিনীয়ে উপত্যকাত দীৰ্ঘদিনে সন্ত্ৰাস চলাই অহা এগৰাকী শীৰ্ষ সন্ত্ৰাসবাদী কামাণ্ডাৰক গুলিয়াই নিধন কৰিবলৈ সক্ষম হয় ৷ বুধবাৰে দক্ষিণ কাশ্মীৰৰ পুলৱামা জিলাত নিৰাপত্তা বাহিনীৰে হোৱা সংঘৰ্ষত নিধন হয় হিজবুল মুজাহিদীনৰ শীৰ্ষ কামাণ্ডাৰ আজাদ লালহৰি ৷
পুলৱামাৰ কামৰাজিপুৰাত নিৰাপত্তা বাহিনীৰে হোৱা সংঘৰ্ষত নিধন হয় আজাদ ৷ জম্মু-কাশ্মীৰ আৰক্ষীয়ে লাভ কৰা বিশেষ তথ্যৰ ভিত্তিত সেনা আৰু আৰক্ষীৰ লগতে নিৰাপত্তা বাহিনীয়ে এই অভিযানৰ নেতৃত্ব দিয়ে ৷ এই অভিযানত সেনাৰ 53 ৰাষ্ট্ৰীয় ৰাইফলছৰ এগৰাকী জোৱান শ্বহীদ হয় ৷ এই সংঘৰ্ষৰ পিচতেই ঘটনাস্থলীৰ পৰা নিৰাপত্তা বাহিনীয়ে এটা একে47, গ্ৰেণেড আৰু অন্যান্য আপত্তিজনক সামগ্ৰী জব্দ কৰিবলৈ সক্ষম হয় ৷
হিজবুল মুজাহিদীনৰ কামাণ্ডাৰ আজাদ লালহৰি পুলৱামাৰ লেলহাৰ গাঁৱৰ বাসিন্দা আছিল ৷ 22 মে'ত জম্মু-কাশ্মীৰ আৰক্ষীৰ হেড কনিষ্টবল অনুপ সিঙৰ হত্যাৰ সৈতে জড়িত আছিল আজাদ ৷ আজাদৰ বিৰুদ্ধে জম্মু-কাশ্মীৰ আৰক্ষীত ছখন এজাহাৰ ৰুজু হৈ আছে ৷ আজাদত ৰাজহুৱা সুৰক্ষা আইনৰ অধীনত পূৰ্বেও গ্ৰেপ্তাৰ কৰা হৈছিল যদিও জেলৰ পৰা ওলায়ে হিজবুল মুজাহিদীনত পুনৰ যোগদান কৰিছিল ৷
পুলৱামাৰ এই সংঘৰ্ষত সেনাৰ 53 ৰাষ্ট্ৰীয় ৰাইফলছৰ জোৱান ছোৱাৰ জিলাজিৎ সিং শ্বহীদ হয় বুলি শ্ৰীনগৰস্থিত সেনাৰ মুখপাত্ৰ কৰ্ণেল ৰাজেশ কালিয়াই ইটিভি ভাৰতৰ আগত প্ৰকাশ কৰিছে ৷ গুৰুতৰভাৱে আঘাতপ্ৰাপ্ত সিঙক সেনাৰ 92 বেছ হাস্পতাললৈ অনা হয় যদিও চিকিৎসাধীন অৱস্থাতে মৃত্যুক সাৱতি লয় ৷ সিঙৰ ঘৰ উত্তৰ প্ৰদেশৰ জুৱানপুৰ জিলাত বুলি জানিব পৰা গৈছে ৷
লগতে পঢ়কঃ জম্বু-কাশ্মীৰত সন্ত্ৰাসবাদীৰ আক্ৰমণ আহত সুৰক্ষা বাহিনীৰ এগৰাকী জোৱান
