নেশ্যনেল ডেস্ক, 5 ফেব্ৰুৱাৰী : নিৰ্ভয়া কাণ্ডৰ গোচৰত দিল্লী উচ্চ ন্যায়ালয়ে চাৰিওজন দোষীক পৃথকে ফাঁচী দিব পৰা নাযায় বুলি দিয়া ৰায়ৰ প্ৰত্যাহ্বান জনাই কেন্দ্ৰীয় চৰকাৰে সৰ্বোচ্চ ন্যায়ালয়ত আবেদন দাখিল কৰিছে ৷
ইয়াৰ পূৰ্বে দিল্লী পাটিয়ালা হাউছ আদালতে নিৰ্ভয়া কাণ্ডৰ দোষীৰ মৃত্যুদণ্ডৰ ৱাৰেন্ট কাৰ্যকৰী কৰাৰ ক্ষেত্ৰত প্ৰতিবন্ধকতাৰ ৰায় দিছিল ৷ এই ক্ষেত্ৰত কেন্দ্ৰীয় চৰকাৰে দিল্লী আদালতত আবেদন দাখিল কৰিছিল আৰু সেই সম্পৰ্কত আজি শুনানি গ্ৰহণ কৰা হৈছিল ৷
দিল্লী উচ্চ ন্যায়ালয়ে আজি দিয়া ৰায়টোৰ কিছু সময় পাচতে কেন্দ্ৰীয় চৰকাৰে ইয়াৰ প্ৰত্যাহ্বান জনায় ৷ উল্লেখ্য যে, দিল্লী উচ্চ ন্যায়ালয়ে বুধবাৰে এইবুলি ৰায় প্ৰদান কৰে যে, নিৰ্ভয়া কাণ্ডৰ আটাইকেইজন দোষীক পৃথকে শাস্তি প্ৰদানৰ বিপৰীতে একেলগে ফাঁচী দিব লাগে ৷
নিম্ন আদালতে যোৱা 31 জানুৱাৰীত নিৰ্ভয়া কাণ্ডৰ দোষী মুকেশ কুমাৰ সিং(32), পৱন গুপ্তা (25), বিনয় কুমাৰ শৰ্মা (26) আৰু অক্ষয় কুমাৰৰ (31) ফাঁচী সন্দৰ্ভত পৰৱৰ্তী ৰায়দানলৈ স্থগিত ৰাখিছিল ৷ সম্প্ৰতি চাৰিওজন দোষী তিহাৰ কাৰাগাৰত বন্দী হৈ আছে ৷
