নিউজ ডেস্ক, 22 আগষ্টঃ জম্মু-কাশ্মীৰৰ শেহতীয়া পৰিস্থিতিক লৈ শুকুৰবাৰে জম্মুস্থিত বিজেপি কাৰ্যালয়ত এখন সাংগঠনিক সভা অনুষ্ঠিত হৈ যায় ৷ সভাত জম্মু-কাশ্মীৰৰ বহুসংখ্যক বিজেপি কৰ্মকৰ্তাকে ধৰি মন্ত্ৰী আৰু বিধায়কসকল উপস্থিত থাকে ৷
সভাত জম্ম-কাশ্মীৰৰ শেহতীয়া পৰিস্থিতিৰ ওপৰত বিশদভাৱে আলোচনা অনুষ্ঠিত হয় ৷ বিশেষ সূত্ৰৰ পৰা লাভ কৰা তথ্য অনুসৰি, আগন্তুক বিধানসভা নিৰ্বাচনক লৈ ৰাষ্ট্ৰীয় কাৰ্যকৰ্তা বিনোদ সোনকৰে সভাত বিজেপিৰ ৰণনীতিৰ বিষয়ে উল্লেখ কৰে ৷ সাংবাদিকৰ সৈতে হোৱা বাৰ্তালাপত সোনকৰে অনুচ্ছেদ 370 দেশৰ বাবে এক কলংক আছিল বুলি উল্লেখ কৰে ৷ জম্মু-কাশ্মীৰক কলংকমুক্ত কৰাৰ বাবে প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহক ধন্যবাদ জ্ঞাপন কৰে সোনকৰে ৷ বিৰোধী নেতাক গৃহবন্দী কৰা হৈছে নেকি বুলি প্ৰশ্ন কৰাত কোনো নেতাকে গৃহবন্দী কৰা হোৱা নাই বুলি কৈ ভয়তে সেইসকলৰ নেতাই নিজ গৃহত সোমাই আছে বুলি কয় বিজেপিৰ জ্যেষ্ঠ নেতাগৰাকীয়ে ৷ ইন্টাৰনেটকে ধৰি অন্যান্য সেৱাসমূহ বন্ধ কৰা সন্দৰ্ভত সেয়া অস্থায়ী বুলি উল্লেখ কৰি পৰিস্থিতি ধীৰে ধীৰে সামান্য হৈ পৰিব বুলি কয় বিনোদ সোনকৰে ৷
