নিউজ ডেস্ক, 23 জুলাইঃ অসমৰ শেহতীয়া প্ৰলয়ংকাৰী বান সমস্যাৰ পৰা ৰাজ্যবাসীক সকাহ প্ৰদান কৰি বুধবাৰে ৰাজ্য চৰকাৰলৈ মুঠ 346 কোটি টকা সাহাৰ্যৰ ঘোষণা কৰে কেন্দ্ৰীয় চৰকাৰে ৷ অসমত এতিয়ালৈকে 56 লাখ লোক বানত প্ৰভাৱিত হোৱাৰ পিছতে কেন্দ্ৰই গ্ৰহণ কৰে এই সিদ্ধান্ত ৷ ৰাজ্যৰ বান ব্যৱস্থাপনা আঁচনি (FMP)ৰ অধীনত এই সাহাৰ্য আগবঢ়াব কেন্দ্ৰীয় চৰকাৰে ৷
কেন্দ্ৰীয় জলশক্তি মন্ত্ৰী গজেন্দ্ৰ সিং শ্বেখাৱতে এক ভিডিঅ’ কনফাৰেন্সযোগে ৰাজ্যৰ বান পৰিস্থিতি সম্পৰ্কে মুখ্যমন্ত্ৰী সৰ্বানন্দ সোণোৱালৰ সৈতে বিস্তৃত আলোচনা কৰে আৰু ইয়াৰ পিছতে তেওঁ এই সাহাৰ্যৰ কথা অৱগত কৰে ৷ উক্ত ভিডিঅ’ কনফাৰেন্সত মুখ্যমন্ত্ৰীসহ ৰাজ্যিক জলসম্পদ মন্ত্ৰী কেশৱ মহন্ত, ASDMAৰ মুখ্য কাৰ্যবাহী বিষয়া এম এছ মণিবন্নন আৰু মুখ্যমন্ত্ৰীৰ সচিব প্ৰধান সঞ্জয় লোহিয়া আৰু অন্য কেইগৰাকীমান জ্যেষ্ঠ বিষয়া উপস্থিত থাকে ৷
উল্লেখ্য যে, মুখ্যমন্ত্ৰী সোণোৱালে কেন্দ্ৰীয় জলশক্তি মন্ত্ৰী গৰাকীক বানৰ লগতে এই সমস্যা সমাধানৰ হেতু লোৱা পদক্ষেপসমূহৰ বিষয়েও অৱগত কৰে ৷ মুখ্যমন্ত্ৰী সোণোৱালে বিগত 1951 চনৰ পৰা ৰাজ্যত নিৰ্মিত 5,000 কিলোমিটাৰ শক্তিশালী বান্ধ মজবুত কৰিবলৈ কেন্দ্ৰীয় মন্ত্ৰীগৰাকীক ধন আবণ্টনৰ আহ্বান জনায় ৷ এই ক্ষেত্ৰত মন্ত্ৰী শ্বেখাৱতে মুখ্যমন্ত্ৰী সোণোৱালক এখন পত্ৰ প্ৰেৰণ কৰিবলৈ কয়, যাতে আগন্তুক বছৰত কেন্দ্ৰীয় মন্ত্ৰণালয়ে এই প্ৰস্তাৱ কাৰ্যকৰী কৰিব পাৰে ৷
অচিৰেই কেন্দ্ৰীয় চৰকাৰে এই সম্পৰ্কে ভূটান চৰকাৰৰ সৈতে আলোচনাত মিলিত হ’ব, যাতে অতি শীঘ্ৰেই ইয়াৰ স্থায়ী সমাধান উদঘাটন কৰিব পাৰে ৷ মৌচুমী জলবায়ুৰ সময়ছোৱাত, ভূটানত বান্ধৰ দ্বাৰা অতিৰিক্ত পানী এৰি দিয়াৰ ফলস্বৰূপে সমগ্ৰ অসম বিশেষকৈ বৰপেটা, নলবাৰী আৰু কোকৰাঝাৰ জিলাত বানে অধিক সংহাৰী ৰূপ ধাৰণ কৰে ৷
ASDMAয়ে সদৰি কৰা মতে, চলিত বৰ্ষত এতিয়ালৈকে ৰাজ্যৰ বান আৰু ভূমিস্খলনত মুঠ 115 গৰাকী লোক মৃত্যুমুখত পৰে ৷ বানত সুকীয়াকৈ 89 গৰাকী লোকৰ মৃত্যু হোৱাৰ বিপৰীতে ভূমিস্খলনত 26 গৰাকী লোকৰ মৃত্যু হয় ৷ আনহাতে প্ৰলয়ংকাৰী বানত মুঠ 26 খন জিলাৰ 26 লাখ লোক ক্ষতিগ্ৰস্ত হৈছে ৷ ইয়াৰ লগতে সমগ্ৰ অসমত প্ৰায় 56 লাখ লোক বানত প্ৰভাৱিত হৈছে ৷
লগতে পঢ়ক : ৰাজধানী দিল্লীত বৃক্ষৰোপণ অভিযান মুকলি কৰিব অমিত শ্বাহে
