নেশ্যনেল ডেস্ক, 26 অক্টোবৰ : এজনে আনজনৰ মনৰ কথা অনুভৱ কৰাটো দূৰৰ কথা, কথা এষাৰ শুনিবলৈয়ো সময় ধৈৰ্য একোৱেই নাই আজিকালি মানুহৰ হাতত ৷ অধৈৰ্য বাবেই প্ৰতিদিনে আমি শুনিবলৈ দেখিবলৈ পাওঁ নানা ধৰণৰ হিংসাত্মক ঘটনাই কিদৰে গ্ৰাস কৰি পেলাইছে সমাজখন ৷ ইণ্টাৰনেট, ছ’চিয়েল মিডিয়া এইবোৰ সহজলভ্য হৈ পৰা বাবেই ভাল-বেয়া ঘটনাৰ ভিডিঅ’ আজিকালি মুহূৰ্তৰ ভিতৰতে জুইৰ দৰে বিয়পি পৰে ৷ আপোনালোকে হয়তো প্ৰত্যক্ষ কৰিছে লিফ্টত পোহনীয়া কুকুৰে অন্য মানুহক কামোৰাৰ শিহৰণকাৰী দৃশ্য আৰু ভুক্তভোগীয়ে তাৰ পিচত অভিযোগ কৰিলে কুকুৰৰ গৰাকীয়ে কিদৰে অভব্য আচৰণ কৰে ৷ শেহতীয়াকৈ তেনে এটা ঘটনাই পুনৰ চৰ্চালৈ আহিছে ৷
ঘটনাৰ স্থান বেংগালুৰু ৷ কুকুৰৰ গৰাকীয়ে জলাই দিলে ভুক্তভোগীৰ বাইক ৷ দৰাচলতে ঘটনাটো এনেকুৱা, পুষ্পা নামৰ এগৰাকী মহিলাক নানজুন্দা বাবু নামৰ এজন ব্যক্তিৰ পোহনীয়া কুকুৰটোৱে কামুৰিছিল ৷ কুকুৰে কামোৰাৰ পিচত পুষ্পাই কট্টানুৰ পুলিচ ষ্টেচনত তেওঁৰ মাতৃ গৌৰাম্মাৰ বিৰুদ্ধে অভিযোগ দাখিল কৰে ৷ ইয়াৰ পিচতে ক্ৰোধত ফাটি পৰে নানজুন্দা বাবু ৷ খঙত একো নাই হৈ নানজুন্দা বাবুয়ে ধমকি দি কয়, ‘মই অভিযোগকাৰীক সাৰি যাব নিদিও’ ৷
23 অক্টোবৰৰ দিনা পুষ্পাৰ পুত্ৰই ঘৰৰ সন্মুখতে বাইকখন ৰখাই থৈ দিছিল ৷ ঘৰৰ সন্মুখতে ৰখাই থোৱা অৱস্থাতে বাইকখন অগ্নিদগ্ধ হয় ৷ পুষ্পাৰ পৰিয়ালে অভিযোগ কৰিছে যে নানজুন্দা বাবুৱেই পৰিয়ালৰ সৈতে মিলি এই অগ্নিকাণ্ড সংঘটিত কৰে ৷ কট্টানুৰ পুলিচ ষ্টেচনত অভিযোগ দাখিল কৰাৰ পাচত এতিয়া আৰক্ষীয়ে নানজুন্দা বাবুক আটক কৰি ঘটনাৰ তদন্ত আৰম্ভ কৰিছে ৷
লগতে পঢ়ক : Land dispute: শিৰশ্ছেদতকৈও ভয়ংকৰ ! ট্ৰেক্টৰেৰে মৰণা মৰাদি চেপি চেপি হত্যা যুৱকক
