ধাৰাপুৰ, 26 মে’: উচ্চ ন্যায়ালয়ে মহানগৰীৰ ধাৰাপুৰত জুবিন গাৰ্গৰ অনুষ্ঠানত মহানগৰ আৰক্ষীক নিৰাপত্তা প্ৰদানৰ নিৰ্দেশ প্ৰদান কৰিছিল যদিও জুবিনৰ সংগীতানুষ্ঠান উপভোগ কৰিবলৈ দৰ্শকৰ উপস্থিতি কম হোৱা দেখিবলৈ পোৱা গ’ল । জুবিনৰ সংগীতানুষ্ঠানলৈ অনা অধিকংশ চকীয়েই খালী হৈ ৰ’ল । 25 মে’ৰ দিনাখন ধাৰাপুৰত হোৱা এইখন আছিল চলিত বৰ্ষৰ জুবিন গাৰ্গৰ অন্তিমটো অনুষ্ঠান । অথচ ধাৰাপুৰবাসীয়ে জুবিন গাৰ্গৰ অনুষ্ঠান উপভোগ কৰিবলৈ উপস্থিত নহ’ল ।
জানিব পৰা মতে গায়কগৰাকী উপস্থিত হোৱাৰ পূৰ্বে মহিলাৰ বাবে অনা 3000 চকীৰ ভিতৰত প্ৰায় 300 চকীত মহিলা বহিছিল যদিও পৰৱৰ্তী সময়ত ভিৰ দেখুৱাবলৈ মহিলাৰ সংৰক্ষিত চকীত পুৰুষক বহিবলৈ দিয়া হৈছিল ।
উল্লেখ কৰা প্ৰয়োজন যে ধাৰাপুৰত জুবিন গাৰ্গৰ অনুষ্ঠানত সুৰক্ষা প্ৰদান কৰিবলৈ উচ্চ ন্যায়ালয়ে আৰক্ষীক নিৰ্দেশ দিছিল । উচ্চ ন্যায়ালয়ৰ নিৰ্দেশমৰ্মে পশ্চিম গুৱাহাটী আৰক্ষী সংমণ্ডলৰ উচ্চ পদস্থ আৰক্ষী বিষয়াৰ উপস্থিতিত আজাৰা আৰক্ষী, CRPF বাহিনী মোতায়েন কৰা হৈছিল ধাৰাপুৰ আঞ্চলিক ৰঙালী বিহুৰ বাকৰিত । কিন্তু আশানুৰূপভাৱে জুবিন গাৰ্গৰ সংগীতানুষ্ঠানত অনুৰাগী উপস্থিত হোৱা দেখা নগ’ল ।
স্মৰ্তব্য যে, বিগত 27 এপ্ৰিলত জুবিন গাৰ্গৰ অনুষ্ঠান আছিল যদিও ধুমুহাৰ ফলত পেণ্ডেল পৰি বহু লোক আহত হৈছিল । সাংবাদিকৰ দলে আহত লোকক উদ্ধাৰ কৰাৰ পিছত কমিটিৰ একাংশ কৰ্মকৰ্তাৰ বাবেই সাংবাদিক আৰু বহুতো লোক প্ৰহৃত হ’বলগীয়া হৈছিল । আৰক্ষীকো উদণ্ড যুৱকে প্ৰহাৰ কৰাৰ ঘটনা সংঘটিত হৈছিল । পৰৱৰ্তী সময়ত আৰক্ষীয়ে বিনা বিচাৰে কমিটিৰ সন্দেহৰ ভিত্তিত 22 জনকৈ যুৱকক কৰায়ত্ত কৰি 8 জনক জেললৈ প্ৰেৰণ কৰিছিল আৰু বাকীকেইজনক জাননী দি এৰি দিছিল ।
এই খামখেয়ালিৰ বাবেই ধাৰাপুৰত জুবিনৰ অনুষ্ঠান উপভোগ কৰিবলৈ দৰ্শক উপস্থিত নহ’ল বুলি অনুমান কৰা হৈছে ।
