আমিনগাঁও, 26 মে’ : গৰম তেলৰ আক্ৰণত আহত শিশুসহ পাঁচগৰাকী মহিলা ৷ আন এগৰাকী মহিলাই ভুক্তভোগী শিশুসহ পাঁচগৰাকী মহিলাৰ ওপৰত গৰম তেলেৰে আক্ৰমণ চলায় ৷ আমিনগাঁৱৰ ইচপাত নগৰত সংঘটিত হৈছে এই ভয়ংকৰ ঘটনা ৷
জানিব পৰা মতে জোনালী হাজৰিকা কলিতা নামৰ এগৰাকী মহিলাই উতলা গৰম তেলেৰে এটা মহিলাৰ দলক আক্ৰমণ কৰাত এটি শিশুসহ পাঁচগৰাকী মহিলা গুৰুতৰভাৱে আহত হৈছে ৷ আঘাতপ্ৰাপ্ত পাঁচ বছৰীয়া শিশুটোৰ নাম সোণমনি বড়ো ৷ আনহাতে এই ঘটনাত মিনতি বড়ো, চকিনা বিবি, প্ৰীতি বেগম,পদুমী বড়ো আৰু মিনা বড়ো নামৰ পাঁচগৰাকী মহিলা আহত হৈছে ৷ ঘটনাত আঘাতপ্ৰাপ্তসকলক নিশাই গুৱাহাটী চিকিৎসা মহাবিদ্যালয়লৈ প্ৰেৰণ কৰা হৈছে ৷ ইতিমধ্যে ঘটনা সন্দৰ্ভত ভুক্তভোগীৰ পৰিয়ালে উত্তৰ গুৱাহাটী (গৌৰীপুৰ) আৰক্ষী চকীত এজাহাৰ দাখিল কৰিছে ৷
ইফালে ভুক্তভোগীৰ এজাহাৰৰ ভিত্তিত আৰক্ষীয়ে অভিযুক্ত জোনালী হাজৰিকা কলিতা নামৰ মহিলাগৰাকীক আটক কৰি আৰম্ভ কৰিছে তদন্তৰ ৷ জানিব পৰা মতে কোনো এক ঘটনাক কেন্দ্ৰ কৰি জোনালীয়ে শুকুৰবাৰে আক্ৰমণ কৰিছিল প্ৰতিৱেশী মহিলা কেইগৰাকীক ৷ তাৰ পিচতেই স্থানীয় মহিলাসকলে অনুষ্ঠিত কৰিছিল "বিচাৰ মেল" ৷ এই ৰাজহুৱা বিচাৰ মেললৈ জোনালীক মতা হৈছিল যদিও তেওঁ ৰাইজৰ কথাত গুৰুত্ব নিদি মেলত উপস্থিত হোৱা নাছিল ৷ তাকে লৈ মহিলা সকলে জবাবদিহি কৰিছিল আক্ৰমণকাৰী জোনালীক ৷
নিজৰ দোকানত গৰম পকৰি ভাজি থকা জোনালীয়ে প্ৰথমে মহিলাসকলৰ লগত তৰ্কযুদ্ধত লিপ্ত হয় যদিও পিচলৈ উতলা গৰম তেলেৰে আক্ৰমণ কৰে মহিলাৰ দলটোক ৷ এই সমগ্ৰ ঘটনাক কেন্দ্ৰ কৰি আমিনগাঁও ইচপাত নগৰত তীব্ৰ চাঞ্চল্যৰ সৃষ্টি হৈছে আৰু দোষীক উপযুক্ত শাস্তি বিহিবলৈ দাবী জনাইছে ভুক্তভোগীৰ লগতে ৰাইজে ৷
লগতে পঢ়ক : তিনিচুকীয়াৰ নিচামুক্তি কেন্দ্ৰত কি চলিছে ? ভুক্তভোগীৰ বিস্ফোৰক অভিযোগ - Rehabilitation Cente In Tinsukia
