মৰিগাঁও, 29 মাৰ্চ : মৰিগাঁও জিলাৰ সমীপৱৰ্তী ময়নগুৰিত লোমহৰ্ষক হত্য়াকাণ্ডৰ ঘটনা সংঘটিত হৈছে । সুৰাৰ ৰাগীত মাতাল হৈ মোমায়েকে শিৰচ্ছেদ কৰিলে ভাগিনীয়েকক ৷
ঘটনাৰ বিৱৰণী অনুসৰি, শুকুৰবাৰে দুপৰীয়াৰ ভাগত গাঁও প্ৰধানগৰাকীলৈ ৰূপন লস্কৰ নামৰ লোকজনে এজন লোকক শিৰচ্ছেদ কৰি হাতত কটা মুণ্ড আৰু দা লৈ পথত থিয় হৈ থকা বুলি খবৰ দিয়ে ৷ এই খবৰ পোৱাৰ লগে লগে গাঁও প্ৰধানগৰাকী ঘটনাস্থলীত উপস্থিত হয় ৷
তেওঁ আহি দেখে যে, ৰূপনে ভাগিনীয়েক ভৌমিক কোঁৱৰক দাৰে ঘপিয়াই হত্যা কৰি হাতত মুণ্ডটো লৈ ঘটনাস্থলীত উপস্থিত আছে ৷ লগে লগে গাঁৱৰ লোকে ঘটনা সন্দৰ্ভত আৰক্ষীক অৱগত কৰে ৷
লগে লগে স্থানীয় আৰক্ষীয়ে ঘটনাস্থলীত উপস্থিত হৈ ৰূপন লস্কৰক গ্ৰেপ্তাৰ কৰে ৷ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে মৰিগাঁও অসামৰিক চিকিৎসালয়লৈ প্ৰেৰণ কৰা হৈছে বুলি জানিব পৰা গৈছে ৷
পৰৱৰ্তী সময়ত আৰক্ষীয়ে সোধাপোছা কৰাত এই ঘটনা মাটি-বাৰীক কেন্দ্ৰ কৰি অব্যাহত থকাৰ কাজিয়াৰ চূড়ান্ত পৰিণতিৰ ফলত সংঘটিত হোৱা বুলি ধাৰণা কৰা হৈছে ৷
লগতে গাঁও প্ৰধানগৰাকীৰ ভাষ্যমতে ঘৰে-ঘৰে দিন হাজিৰা কৰি জীৱন নিৰ্বাহ কৰিছিল মোমায়েক ৰূপন লস্কৰে ৷ ঘটনাস্থলীত আপত্তিজন সামগ্ৰী উদ্ধাৰ হোৱা বুলি জানিব পৰা গৈছে ।
এই ঘটনা সংঘটিত কৰাৰ সময়ত লোকজনে সুৰাপান কৰি থকা বুলি গম পোৱা গৈছে ৷ সম্প্ৰতি ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে ৷ আৰক্ষীৰ জেৰাত ৰূপনে এতিয়ালৈ মুখ খোলা নাই যদিও পৰৱৰ্তী সময়ত ঘটনাৰ আঁৰৰ প্ৰকৃত কাৰণ পোহৰলৈ অহাৰ সম্ভাৱনা আছে ৷ এই ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে ৷
লগতে পঢ়ক: বেতজান চাহ বাগিচাত পাত ছিঙি থকা অৱস্থাত মহিলাক শিৰচ্ছেদ
