গুৱাহাটী, ১১ মে' : গুৱাহাটী মহানগৰীৰ নুনমাটিৰ এটা অঞ্চলত সংঘটিত হৈছে এক চাঞ্চল্যকৰ ঘটনা । অঞ্চলটোৰ এটা পৰিয়ালৰ ওপৰত বিগত ১৭ দিন ধৰি কোনো অদৃশ্য শক্তিয়ে ধাৰাবাহিকভাৱে চলাই গৈছে উপদ্ৰৱ । যাক লৈ নিৰাপত্তাহীনতাত ভুগিছে পৰিয়ালটোৱে । অদৃশ্য শক্তিৰ উপদ্ৰৱৰ পৰা পৰিত্ৰাণ পাবলৈ কৰণীয় সকলোখিনি কৰিও বিফল হৈ পৰিছে পৰিয়ালটো । ফলত চিন্তিত হৈ পৰিছে পৰিয়ালটোৰ লগতে স্থানীয় ৰাইজ ।
জানিব পৰা মতে, নুনমাটিৰ পূৱ ভৱানীপুৰৰ বাসিন্দা নাগেশ্বৰী দেৱী নামৰ এগৰাকী মহিলাৰ ঘৰত বিগত ১৭ দিন ধৰি কোনো অদৃশ্য শক্তিয়ে ঘৰৰ ভিতৰে বাহিৰে বাচন-বৰ্তন, শিল আদি দলিয়াই সন্ত্ৰাসৰ সৃষ্টি কৰি আহিছে । আনকি অদৃশ্য শক্তিয়ে দিনৰ পোহৰতে ঘৰৰ আলমিৰা আদিৰ আইনা ভাঙি চূৰমাৰ কৰা বুলিও জানিব পৰা গৈছে । অদৃশ্য শক্তিৰ পৰা পৰিত্ৰাণ পাবলৈ বেজ, তান্ত্ৰিকৰ সহায় লোৱাৰ উপৰিও পূজা-অৰ্চনা কৰিছে যদিও কোনো সুফল লাভ কৰা নাই ।
শেহতীয়াকৈ আৰক্ষীয়ে ঘটনাস্থলীত উপস্থিত হৈ ঘটনাৰ উৎস বিচাৰি তদন্ত অব্যাহত ৰাখিছে যদিও বৰ্তমানলৈ কোনো তথ্য লাভ কৰিবলৈ সক্ষম হোৱা নাই । সম্প্ৰতি উক্ত ঘটনাক কেন্দ্ৰ কৰি অঞ্চলটোত অব্যাহত আছে তীব্ৰ চাঞ্চল্য । ইফালে অঞ্চলটোৰ আয়তীসকলে ভূত-প্ৰেত থকাৰ সন্দেহ প্ৰকাশ কৰি ভুক্তভোগী পৰিয়ালটোৰ ঘৰত নাম-প্ৰসংগও অব্যাহত ৰাখিছে ।
প্ৰকৃততে এইয়া কোনো ঐশ্বৰিক শক্তি, অন্ধবিশ্বাস নে উদেশ্য প্ৰাণোদিতভাৱে কোনো লোকে সংঘটিত কৰিছে এই ঘটনা সেয়া বৰ্তমান পৰ্যন্ত জানিব পৰা হোৱা নাই । এতিয়া প্ৰশ্ন হয়, বিজ্ঞান-প্ৰযুক্তিয়ে তীব্ৰ গতিত উত্তৰণ কৰাৰ সময়ত ভূত-প্ৰেত বা ঐশ্বৰিক শক্তিক বিশ্বাস কৰা কিমান সমীচিন ?
অন্ধবিশ্বাসৰ ফলত নিৰীহ জনতাই প্ৰাণ হেৰুওৱাৰ পাচতো এনেবোৰ কথা আজিৰ সময়ত কিমান যুক্তিপূৰ্ণ ? নে সঁচাকৈয়ে বৰ্তমানো ভূত-প্ৰেত বা ঐশ্বৰিক শক্তিৰ প্ৰসংগ চৰ্চাৰ বিষয় হৈ আছে ? সকলো পোহৰলৈ আহিব আৰক্ষীৰ তদন্তৰ পাচত ।
