আমগুৰি, ২ জুন: ৰাজ্যৰ ক্ষুদ্ৰ চাহ খেতিয়কক ভাতে মৰাৰ ষড়যন্ত্ৰত লিপ্ত হৈছে বটলিফ কোম্পানী । বটলীফ কোম্পানীৰ বাবেই কেঁচা চাহপাতৰ প্ৰকৃত মূল্যৰ পৰা বঞ্চিত চাহ খেতিয়কসকল । এনে ষড়যন্ত্ৰৰ বিৰুদ্ধে সৰৱ হৈ পৰিছে শিৱসাগৰ জিলা ক্ষুদ্ৰ চাহ খেতিয়ক সন্থা । শিৱসাগৰ জিলা ক্ষুদ্ৰ চাহ খেতিয়ক সন্থাই শনিবাৰে এক সংবাদমেল সম্বোধন কৰি এই ষড়যন্ত্ৰত লিপ্ত বটলিফ কোম্পানীৰ বিৰুদ্ধে আন্দোলনৰ ভাবুকি দিয়ে ।
শেহতীয়াভাৱে বটলিফ কোম্পানীয়ে ক্ষুদ্ৰ চাহ খেতিয়কৰ কেঁচা চাহপাত ক্ৰয় নকৰে বুলি ঘোষণা কৰাৰ পিচতেই সৰৱ হৈ পৰিছিল এই খেতিয়কসকল । শিৱসাগৰ জিলাত ১৯ টা বটলিফ কোম্পানীয়ে কেঁচা চাহপাত ক্ৰয়ৰ বিপৰীতে ২টা বটলিফ কোম্পানীয়ে বৰ্তমানেও গ্ৰহণ কৰা নাই ক্ষুদ্ৰ চাহ খেতিয়কৰ কেঁচা চাহপাত ।
শিৱসাগৰ জিলা ক্ষুদ্ৰ চাহ খেতিয়ক সন্থাই জয়া ফেক্টৰী আৰু এছ কে ফেক্টৰী নামৰ বটলিফ কোম্পানীৰ বিৰুদ্ধে গ্ৰহণ কৰিব প্ৰতিবাদী কাৰ্যসূচী । শিৱসাগৰ জিলা ক্ষুদ্ৰ চাহ খেতিয়ক সন্থাই শনিবাৰে এক সংবাদমেল সম্বোধন কৰি দুই বটলিফ কোম্পানীৰ বিৰুদ্ধে সৰৱ হৈ আন্দোলনৰ কাৰ্যসূচী গ্ৰহণ কৰিব বুলি সকীয়াই দিছে । অহা ৩ জুনত এই দুই বটলিফ কোম্পানীৰ বিৰুদ্ধে ব্যৱস্থা গ্ৰহণৰ বাবে ভাৰতীয় চাহ ব'ৰ্ডলৈ প্ৰেৰণ কৰিব দাবী পত্ৰ । ৫ জুনত গ্ৰহণ কৰিব প্ৰতিবাদী কাৰ্যসূচী । ৫ জুনত পথ অৱৰোধেৰে প্ৰতিবাদ সাব্যস্ত কৰিব ক্ষুদ্ৰ চাহ খেতিয়কসকলে ।
শিৱসাগৰ জিলা ক্ষুদ্ৰ চাহ খেতিয়ক সন্থাই সংবাদমেলত ক্ষুদ্ৰ চাহ খেতিয়কক ভাতে মৰাৰ ষড়যন্ত্ৰ কৰা বটলিফ কোম্পানীৰ বিৰুদ্ধে সৰৱ হৈ কয় যে শিৱসাগৰ জিলাৰ দুটাকৈ বটলিফ কোম্পানীৰ অনুজ্ঞাপত্ৰ বাতিল কৰিবলৈ অহা ৩ জুনত চাহ ব'ৰ্ড আৰু জিলা আয়ুক্তক দাবী পত্ৰ প্ৰদান কৰিব ।
অসমত প্ৰায় ২ লাখ চাহ খেতিয়কক পেটে মৰাৰ ব্যৱস্থাৰ বিৰুদ্ধে সৰৱ হৈ শিৱসাগৰ জিলা ক্ষুদ্ৰ চাহ খেতিয়ক সন্থাই জিলাখনৰ জয়া ফেক্টৰী আৰু এছ কে ফেক্টৰীৰ বিৰুদ্ধে ব্য়ৱস্থা গ্ৰহণৰ দাবী জনাইছে । ক্ষুদ্ৰ চাহ খেতিয়কৰ ১০০ শতাংশ কেচা চাহপাত ক্ৰয় কৰাৰ প্ৰতিশ্ৰুতি প্ৰদানেৰে অনুজ্ঞাপত্ৰ লাভ কৰা এই দুই ফেক্টৰীৰ অনুজ্ঞাপত্ৰখন বাতিল কৰিবলৈ প্ৰতিবাদী কাৰ্যসূচী গ্ৰহণৰ হুংকাৰ দিছে শিৱসাগৰ জিলা ক্ষুদ্ৰ চাহ খেতিয়ক সন্থাই ।
