নিউজ ডেস্ক, ২৬ মে’: পাকিস্তান আৰু ইংলেণ্ডৰ মাজত দ্বিপাক্ষিক শৃংখলাৰ দ্বিতীয়খন টি-২০ কিছু মুহূৰ্তৰ বাবে স্তব্ধ হৈ পৰিছিল ৷ এজন অনুৰাগীয়ে খেলৰ সময়তে পিটছত প্ৰৱেশ কৰাৰ বাবেই স্তব্ধ হৈ পৰে মেচখন ৷ বাৰ্মিংহামত অনুষ্ঠিত দ্বিতীয়খন টি-২০ মেচত সংঘটিত হয় এই ঘটনা ৷
অহা মাহত আৰম্ভ হ'বলগীয়া আইচিচি টি-২০ বিশ্বকাপৰ পূৰ্বে দুয়োটা দলে চাৰিখনীয়া টি-২০ শৃংখলাত ব্যস্ত হৈ পৰিছে আৰু এই শৃংখলাটোৱে টি-২০ বিশ্বকাপৰ বাবে তেওঁলোকৰ বাবে প্ৰস্তুতি হিচাপে কাম কৰিব ।
মেচখনত পাকিস্তানে টছত জিকি প্ৰথমে ফিল্ডিং কৰিবলৈ বাছি লৈছিল আৰু ইংলেণ্ডে জোছ বাটলাৰ দৰ্শনীয় অৰ্ধশতকৰ সহায়ত নিৰ্ধাৰিত ২০ অভাৰত ৭ উইকেট হেৰুৱাই ১৮৩ ৰান সংগ্ৰহ কৰে ৷ বাটলাৰে ৫১ টা বলত ৮ টা বাউণ্ডেৰী আৰু ৩ টা ছিক্সাৰৰ সহায়ত ৮৪ ৰানৰ ইনিংছ খেলে ৷ পাকিস্তানৰ হৈ শ্বাহীন আফ্ৰিদীয়ে ৩টা উইকেট দখল কৰাৰ বিপৰীতে ইমাদ ৱাছিম আৰু হৰিছ ৰৌফে দুটাকৈ উইকেট দখল কৰে ।
১৮৪ ৰাণৰ লক্ষ্য অনুসৰণ কৰি পাকিস্তানে নিয়মীয়া ব্যৱধানত উইকেট হেৰুৱাইছিল যদিও ১৫ অভাৰত পেলেষ্টাইনৰ পতাকা লৈ এজন অনুৰাগীয়ে খেলপথাৰত প্ৰৱেশ কৰাত ইনিংছত বাধাৰ সৃষ্টি হয় । ভিৰৰ পৰা পতাকা লৈ ফিল্ডৰ মাজলৈ দৌৰি যোৱা দেখা গ’ল অনুৰাগী গৰাকীক । ইয়াৰ পিছতে নিৰাপত্তাৰক্ষীয়ে তেওঁৰ পৰা পতাকাখন লৈ ষ্টেডিয়ামৰ পৰা উলিয়াই আনে ।
ভাৰত আৰু অষ্ট্ৰেলিয়াৰ মাজত অনুষ্ঠিত হোৱা এদিনীয়া বিশ্বকাপ ২০২৩ৰ খেলখনতো একেধৰণৰ ঘটনা সংঘটিত হৈছিল ৷ পেলেষ্টাইনৰ পতাকা লৈ কোনো ব্যক্তিয়ে খেলপথাৰত প্ৰৱেশ কৰাৰ এয়া প্ৰথম ঘটনা নহয় । শেষত ইংলেণ্ডে ১৬০ ৰানত পাকিস্তানক অল আউট কৰে আৰু ২৩ ৰাণত জয়লাভ কৰে ।
লগতে পঢ়ক: আই পি এলৰ ফাইনেল: কলকাতা নে হায়দৰাবাদ, কোনে দখল কৰিব খিতাপ ? - IPL 2024
