নগাঁও, 21 এপ্ৰিল : নগাঁও লোকসভা সমষ্টিৰ কংগ্ৰেছ প্ৰাৰ্থী প্ৰদ্যুৎ বৰদলৈয়ে দুমাহ পূৰ্বে বিজেপিত যোগদানৰ বাবে যোগাযোগ কৰা বুলি মন্ত্ৰী পীযুষ হাজৰীকাই উত্থাপন কৰা অভিযোগক লৈ সম্প্ৰতি উত্তাল হৈ আছে নগাঁৱৰ ৰাজনীতি ৷ এইবাৰ কামাখ্যাত শপত খাবলৈ প্ৰদ্যুৎ বৰদলৈক প্ৰত্যাহ্বান জনাইছে মন্ত্ৰী পীযুষ হাজৰীকাই ৷
প্ৰথমে প্ৰদ্যুৎ বৰদলৈৰ বিৰুদ্ধে অভিযোগ উত্থাপন কৰিছিল পীযুষ হাজৰীকাই ৷ মন্ত্ৰীগৰাকীয়ে উত্থাপন কৰা অভিযোগ মতে প্ৰদ্যুৎ বৰদলৈৰ প্ৰাৰ্থিত্ব নিশ্চিত হোৱাৰ পূৰ্বে তেওঁৰ সৈতে বিজেপিৰ টিকট বিচাৰি কংগ্ৰেছ প্ৰাৰ্থীগৰাকীয়ে যোগাযোগ কৰিছিল ৷ এই অভিযোগ উত্থাপন কৰাৰ পিচতেই মন্ত্ৰী হাজৰীকাক প্ৰত্যাহ্বান জনায় প্ৰদ্যুৎ বৰদলৈয়ে ৷ বিজেপিত যোগদানৰ বাবে মন্ত্ৰী পীযুষ হাজৰীকাক যোগাযোগ কৰাৰ প্ৰমাণ ৰাজহুৱা কৰিবলৈ শনিবাৰে কংগ্ৰেছ প্ৰাৰ্থী প্ৰদ্যুৎ বৰদলৈয়ে ই টি ভি ভাৰতৰ জৰিয়তে মন্ত্ৰীগৰাকীক প্ৰত্যাহ্বান জনাইছিল ৷ প্ৰদ্যুৎ বৰদলৈয়ে প্ৰত্যাহ্বান জনোৱাৰ পিচতেই দেওবাৰে পুনৰ আক্ৰমাণাত্মক হৈ পৰে মন্ত্ৰী পীযুষ হাজৰীকা ৷ সোমবাৰে পুৱাই একেলগে কামাখ্যাত শপত খাবলৈ প্ৰদ্যুৎ বৰদলৈক প্ৰত্যাহ্বান জনালে মন্ত্ৰীগৰাকীয়ে৷
ইফালে চামগুৰিত ৰকিবুল হুছেইনে পৰাজয়ৰ উমান পাই ধুবুৰীলৈ পলায়ন কৰা বুলি মন্তব্য কৰে মন্ত্ৰী পীযুষ হাজৰীকাই ৷ দেওবাৰে নগাঁও চহৰৰ সমীপৰ শিয়ালমাৰীত অনুষ্ঠিত হোৱা বিজেপিৰ এক নিৰ্বাচনী সভাত অংশগ্ৰহণ কৰি কংগ্ৰেছক তীব্ৰ কটাক্ষ কৰে মন্ত্ৰী হাজৰীকাই ৷ কংগ্ৰেছ চৰকাৰৰ দিনত চৰকাৰী চিকিৎসকৰ সংখ্যা কম থকাৰ বাবেই বহু নিৰীহ ৰোগী মৃত্যুমুখত পৰিছিল বুলি ভাষণত উল্লেখ কৰি চিকিৎসাৰ অভাৱত ৰোগীৰ মৃত্যু হোৱাৰ বাবে কংগ্ৰেছ জগৰীয়া বুলিও মন্তব্য কৰে মন্ত্ৰীগৰাকীয়ে ৷ লগতে মুখ্যমন্ত্ৰী ড৹ হিমন্ত বিশ্ব শৰ্মা নেতৃত্বাধীন চৰকাৰে পূৰ্বে ভোট লাভ নকৰা এলকাতো মথাউৰি নিৰ্মাণকে ধৰি বিভিন্ন উন্নয়নমূলক কাম কৰা বুলি দাবী কৰি ভোট লাভ কৰিলে অধিক উন্নয়নৰ প্ৰতিশ্ৰুতি দিয়ে মন্ত্ৰী পীযুষ হাজৰীকাই ৷
উল্লেখ্য যে, দেওবাৰে নগাঁৱৰ শিয়ালমাৰীত অনুষ্ঠিত হোৱা বিজেপিৰ নিৰ্বাচনী সভাত কংগ্ৰেছ নেতা ৰকিবুল হুছেইনৰ ঘনিষ্ঠ কেবাগৰাকী নেতাৰ নেতৃত্বত দলটোৰ ছয় শতাধিক কৰ্মী-সমৰ্থকে বিজেপিত যোগদান কৰে ৷ ইফালে দেওবাৰে নগাঁৱৰ কেবাটাও প্ৰান্তত বিজেপি প্ৰাৰ্থী সুৰেশ বৰাৰ হৈ নিৰ্বাচনী প্ৰচাৰ চলায় মন্ত্ৰী পীযুষ হাজৰীকাই ৷ মন্ত্ৰীগৰাকীৰ সৈতে নিৰ্বাচনী প্ৰচাৰত অংশ লয় বিধায়ক ৰূপক শৰ্মা, নগাঁও জিলা বিজেপিৰ সভাপতি অভিজিৎ নাথসহ কেইবাগৰাকী নেতাই ৷
লগতে পঢ়ক : সাংসদ অজিত কুমাৰ ভূঞাৰ মুখত ‘টকাৰ জয় হ’ব’ প্ৰসংগ - Lok Sabha Election 2024
