নগাঁও, 1 এপ্ৰিল: কিছুদিনৰ পূৰ্বে কংগ্ৰেছ এৰি বিজেপিত যোগদান কৰা নগঞা নেতা সুৰেশ বৰাক এইবাৰ গেৰুৱা দলটোৱে প্ৰক্ষেপ কৰিছে নগাঁও লোকসভা সমষ্টিৰ প্ৰাৰ্থী হিচাপে । পূৰ্বে তিনিবাৰকৈ বঢ়মপুৰ সমষ্টিৰ পৰা নিৰ্বাচন খেলি পৰাস্ত হোৱা সুৰেশ বৰা এইবাৰ থিয় দিছে কংগ্ৰেছৰ জ্যেষ্ঠ নেতা প্ৰদ্যুৎ বৰদলৈৰ বিৰুদ্ধে ।
তিনিটাকৈ বিধানসভা নিৰ্বাচনত পৰাস্ত হোৱা সুৰেশ বৰা এইবাৰ দিল্লীলৈ যোৱাৰ পথ সুগম হ'ব নে ? কি হব সুৰেশ বৰাৰ নিৰ্বাচনী ইচ্যু ৰকিবুল হুছেইনৰ সৈতে বৰ্তমান তেওঁৰ সম্পৰ্ক কেনে ? চামগুৰিত ৰকিবুল হুছেইনে কোৱাৰ দৰে সঁচাকৈয়ে পাপ আছে নেকি সুৰেশ বৰাৰ ? ইটিভি ভাৰতৰ সমুখত সকলো বৰ্ণনা কৰিলে নেতাগৰাকীয়ে ।
আগন্তুত লোকসভা নিৰ্বাচনত জয়ী হ'ব বুলি এক প্ৰকাৰ দৃঢ়তা প্ৰকাশ কৰিছে সুৰেশ বৰাই । 2019 ৰ লোকসভা নিৰ্বাচনত প্ৰদ্যুৎ বৰদলৈৰ হৈ ৰাইজত ভোট খোজা সুৰেশ বৰা এইবাৰ ৰাইজৰ কাষ চাপিছে বৰদলৈৰ বিৰুদ্ধে নিজৰ বাবে ভোট বিচাৰি ।
ইফালে ৰকিবুল হুছেইনে কেইদিনমান পূৰ্বে চামগুৰিত কৈছিল যে সুৰেশ বৰাৰ বহুতো পাপ আছে, যাৰ বাবে তেওঁ নিৰ্বাচনত জয়ী হ'ব নোৱাৰে । সেই সন্দৰ্ভত সুৰেশ বৰাই মন্তব্য প্ৰকাশ কৰে যে ৰকিবুল হুছেইনৰ সৈতে তেওঁৰ ককাই-ভাইৰ দৰে সম্পৰ্ক । আনকি হুছেইনৰ পৰিয়ালৰ সৈতেও আছে সু-সম্পৰ্ক । ডাঙৰ মানুহ কিবা এটা কৈছে কওক বুলি উল্লেখ কৰি ধুবুৰী সমষ্টিৰ পৰা লোকসভা নিৰ্বাচন খেলিবলৈ ওলোৱা ৰকিবুল হুছেইনক শুভেচ্ছা জনালে বৰাই ।
সংখ্যালঘুৰ ভোট সন্দৰ্ভত সুৰেশ বৰাই কয় যে ধিং, লাহৰীঘাট, মৈৰাবাৰী আদিত বিপুল হাৰ সংখ্যালঘু লোকে মুকলিকৈ বিজেপি দলক সমৰ্থন জনাবলৈ আহিছে । প্ৰধানমন্ত্ৰী মোদী আৰু হিমন্ত বিশ্ব শৰ্মাৰ যাদু চলিলে জয় নিশ্চিত বুলিও তেওঁ সদৰী কৰে ।
