নেশ্যনেল ডেস্ক,১৭ মে': সীমান্তৰ সন্ত্ৰাসবাদী কাৰ্যকলাপ সন্দৰ্ভত সৰৱ বৈদেশিক পৰিক্ৰমা মন্ত্ৰী এছ জয়শংকৰ । ভাৰতত যিকোনো ধৰণৰ সীমান্তৰ সন্ত্ৰাসবাদী কাৰ্যকলাপৰ প্ৰতি সহনশীলতা অতি কম বুলি উল্লেখ কৰি তেওঁ পুনৰ কয় যে যদি এনে ধৰণৰ ঘটনা সংঘটিত হয় তেনেহ'লে ইয়াৰ পৰিণাম পৰিলক্ষিত হ'ব ।
চিআইআইৰ বাৰ্ষিক ব্যৱসায় সন্মিলন ২০২৪ত ভাষণ প্ৰদান কৰি জয়শংকৰে কয় যে পাকিস্তানে নিৰন্তৰভাৱে সন্ত্ৰাসবাদৰ অনুশীলন কৰি আহিছে । জয়শংকৰে লগতে কয় যে ২০১৪ চনত ভাৰতে স্পষ্ট সিদ্ধান্ত লৈছিল যে দেশখনে কোনো সীমান্তৰ সন্ত্ৰাসবাদ সহ্য নকৰে । তেওঁ উল্লেখ কৰা মতে ভাৰতৰ ৰাইজে ২০১৪ চনত এটা স্পষ্ট সিদ্ধান্ত লৈছিল যে তেওঁলোকে এই কাৰ্যকলাপ গ্ৰহণ কৰিব নোৱাৰে ।
তেওঁৰ মতে ভাৰতত যিকোনো ধৰণৰ সীমান্তৰ সিপাৰৰ সন্ত্ৰাসবাদ কাৰ্যকলাপৰ প্ৰতি সহনশীলতা অতি কম । যদি এনে ঘটনা সংঘটিত হয় তেনেহ'লে নিয়ন্ত্ৰণ ৰেখা আৰু সমগ্ৰ আন্তৰ্জাতিক সীমান্তৰ দুয়োফালে ইয়াৰ পৰিণাম হ'ব । উৰি আৰু বালাকোট ইয়াৰ স্পষ্ট বাৰ্তা বুলিও তেওঁ উল্লেখ কৰে ।
পাকিস্তানক লক্ষ্য কৰি বৈদেশিক পৰিক্ৰমা মন্ত্ৰীগৰাকীয়ে কয় যে যদি পাকিস্তানে এনে ধৰণৰ কাম কৰা বন্ধ কৰে তেন্তে ভাৰতৰ জনসাধাৰণে তেওঁলোকক সাধাৰণ চুবুৰীয়াৰ দৰে ব্যৱহাৰ কৰিব । তেওঁৰ মতে যদি পাকিস্তানে বহু দশকত গঢ়ি উঠা এই উদ্যোগটো বন্ধ কৰে, তেনেহ'লে মানুহে তেওঁলোকক সাধাৰণ চুবুৰীয়াৰ দৰে ব্যৱহাৰ কৰিব । যদি তেওঁলোকে ইয়াক তেওঁলোকৰ মূল দক্ষতা হিচাপে ব্যৱহাৰ কৰে তেন্তে নিশ্চিতভাৱে ই তেওঁলোকৰ প্ৰতিচ্ছবি নিৰ্ধাৰণ কৰিব বুলিও মন্ত্ৰীগৰাকীয়ে দাবী কৰে ।
তেওঁ উল্লেখ কৰে যে ২০১৯ চনত পাকিস্তানত ইমৰাণ খানৰ চৰকাৰে সম্পৰ্কৰ ক্ষতি কৰিবৰ বাবে বিভিন্ন পদক্ষেপ গ্ৰহণ কৰিছিল ।
চীনৰ কথা উল্লেখ কৰি জয়শংকৰে কয় যে ই অধিক জটিল বিষয় । তেওঁ উল্লেখ কৰা মতে সীমান্ত অঞ্চলত শান্তি আৰু সম্প্ৰীতি বিঘ্নিত হৈছে । যিয়ে আপোনাৰ ড্ৰয়িং ৰুমত প্ৰৱেশ কৰি ঘৰ খেলিমেলি কৰিবলৈ চেষ্টা কৰি আছে তেনে কাৰোবাৰ সৈতে ব্যৱসায় কৰিব নেকি বুলি তেওঁ চীনক উদ্দেশ্যি প্ৰশ্ন কৰে । জয়শংকৰে কয় যে যদি দেশখনে লিখিত চুক্তিৰ পৰা আঁতৰি থাকি ভাৰতৰ সীমান্তত কাৰ্যকলাপ কৰি থাকে তেনেহ'লে ভাৰতে ক'ব নোৱাৰে যে ব্যৱসায় স্বাভাৱিক হিচাপে অব্যাহত থাকিব নে নাথাকে ।
তেওঁ লগতে কয় যে ইয়াৰ অৰ্থ এইটো নহয় যে ব্যৱসায় বন্ধ হৈ যাব । তেওঁৰ মতে ভাৰতে চীনৰ ব্যৱসায়ক উপেক্ষা কৰা নাই আৰু চীনৰ পৰা বিভিন্ন সামগ্ৰী ক্ৰয় কৰি আছে । আন এটা বিষয় উল্লেখ কৰি মন্ত্ৰীগৰাকীয়ে কয় যে বাণিজ্যিক ভাৰসাম্যহীনতাৰ সমস্যা আন এক গুৰুত্বপূৰ্ণ বিষয় ।
জয়শংকৰে লগতে কয় যে আজি বহুতো দেশত ৰাষ্ট্ৰীয় সুৰক্ষা ফিল্টাৰ আছে । ৰাষ্ট্ৰীয় সুৰক্ষা ফিল্টাৰৰ অৰ্থ এইটো নহয় যে কোনো সামগ্ৰী আহিব নোৱাৰে । ইয়াৰ অৰ্থ হৈছে ব্যৱসায়িক প্ৰস্তাৱত আমি কিছুমান ৰাষ্ট্ৰীয় সুৰক্ষা সংবেদনশীলতা মূল্যাংকন কৰিব লাগিব যিবোৰ তাত থাকিব পাৰে । চীনৰ ক্ষেত্ৰত সেই দেশৰ লোকসকলক ভাৰতত নিৰ্মাণ বা বিনিয়োগ কৰিবলৈ উৎসাহিত কৰিব ।
ভাৰতৰ উৎস, ভাৰতৰ পৰা ক্ৰয় আৰু য'ত সম্ভৱ হয় দীৰ্ঘম্যাদী চিন্তা কৰিবলৈ চেষ্টা কৰিব পাৰে কিন্তু ভাৰতে চীনৰ সৈতে কাম কৰাটো সম্পূৰ্ণৰূপে নিষিদ্ধ কৰা নাই বুলি তেওঁ উল্লেখ কৰে । তেওঁ লগতে বিশ্ববাসীক আহ্বান জনাই কয় যে যদি ভাৰতীয় বিকল্প উপলব্ধ হয় তেন্তে তেওঁ ভাৰতীয় কোম্পানীবোৰৰ সৈতে কাম কৰাটো বিচাৰে ।
