মৰাণ, ১ জুন: 'প্লাষ্টিকমুক্ত ব্ৰহ্মপুত্ৰ' লক্ষ্য়ৰে আৰম্ভ হ'ল এক দুঃসাহসিক যাত্ৰা । পেলনীয়া প্লাষ্টিকৰ বটলেৰে নিৰ্মাণ কৰা এখন নাৱত উঠি বগীবিলৰ পৰা ব্ৰহ্মপুত্ৰৰ বুকুৰে গুৱাহাটীলৈ এক দুঃসাহসিক যাত্ৰা ডিব্ৰুগড়ৰ এজন যুৱকৰ । নাওখনেৰে ব্ৰহ্মপুত্ৰৰ কোবাল সোঁত ফালি গৈ থাকিব প্ৰকৃতিপ্ৰেমী যুৱক ধীৰাজ বিকাশ গগৈৰ লগত আন তিনিজন বন্ধু ।
এই যাত্রাকালত বুমনি নামৰ নাওখন বিশাল ব্ৰহ্মপুত্ৰত উপঙি থকা, প্লাষ্টিকৰ পেলনীয়া বটল আৰু আন প্লাষ্টিকৰ আৱৰ্জনাসমূহ বুটলি বুটলি গুৱাহাটী পাবগৈ । প্ৰকৃততে বুমনিৰ উদ্দেশ্যই হৈছে অসম আৰু অসমীয়া জাতিৰ আয়ুসৰেখা ব্ৰহ্মপুত্ৰখন প্ৰদূষণমুক্ত কৰা । শনিবাৰৰ পৰা ডিব্ৰুগড়ৰ বগীবিলৰ পৰা গুৱাহাটীলৈ আৰম্ভ হ'ল এই যাত্ৰা ।
প্লাষ্টিকৰ পেলনীয়া বটল বুটলি মুঠ ৩০০০ টা বটলেৰে নিৰ্মাণ কৰি উলিয়াইছে এই নাওখন । ২৮ ফুট দীঘল ৫ ফুট বহল নাওখন লৈ এই দুঃসাহসিক যাত্ৰাৰ ফ্লেগ অফ কৰি শুভাৰম্ভ কৰে অসম পৰ্যটন নিগমৰ অধ্যক্ষ ঋতুপৰ্ণ বৰুৱাই ।
১৩ দিনত প্ৰায় ৪৫০ কিলোমিটাৰ ব্ৰহ্মপুত্ৰৰ বুকুৱেদি গৈ গুৱাহাটীত তিনি সতীৰ্থৰ সৈতে উপস্থিত হ'ব ধীৰাজ বিকাশ গগৈ । আজি যাত্ৰাৰ শুভাৰম্ভণি অনুষ্ঠানত বহু সচেতন ব্যক্তি উপস্থিত হৈ দুঃসাহসিক যাত্ৰাৰ বাবে ধীৰাজ বিকাশ গগৈ আৰু সহযোগী বন্ধুক জনাইছে শুভেচ্ছা ।
উল্লেখ্যযোগ্য যে ২০২১ ত প্লাষ্টিকৰ বটলৰ নাৱেৰে ধীৰাজ বিকাশ গগৈয়ে ডিব্ৰুগড়ৰ বগীবিলৰ পৰা মাজুলী,দিহিংমুখ আদি ঠাইলৈও একেই থিম লৈ যাত্রা কৰিছিল । ৰাইজৰ সঁহাৰি লাভ কৰিছিল । বৰ্তমান সময়ত মহাবাহু ব্ৰহ্মপুত্ৰৰ দুয়োপাৰে দমে দমে উটি গৈছে প্ৰতিদিনে প্লাষ্টিকৰ বটল আৰু প্লাষ্টিকৰ আন সামগ্ৰী । তেনে সময়ত প্লাষ্টিকমুক্ত ব্ৰহ্মপুত্ৰ কৰাৰ বাবে ধীৰাজ বিকাশ গগৈৰ অভিনৱ প্ৰচেষ্টাক সকলোৱে শলাগ লৈছে ।
