নেশ্যনেল ডেস্ক, ২৬ মে’ : গুজৰাটৰ ৰাজকোটৰ TRP গেম জ’নত সংঘটিত অগ্নিকাণ্ডই ৰাজ্যখনৰ লগতে সমগ্ৰ দেশতে তীব্ৰ প্ৰতিক্ৰিয়াৰ সৃষ্টি কৰিছে ৷ গেম জ’নত সংঘটিত হোৱা অগ্নিকাণ্ডৰ ঘটনা সন্দৰ্ভত আৰক্ষীয়ে পঞ্জীয়ন কৰিছে এক গোচৰ । যুৱৰাজ সিং সোলাংকি আৰু প্ৰকাশ জৈনকে ধৰি ছয়জন অভিযুক্তৰ বিৰুদ্ধে তালুকা থানাত গোচৰ ৰুজু কৰিছে আৰক্ষীয়ে ।
অভিযুক্তৰ বিৰুদ্ধে আই পি চিৰ ৩০৪, ৩০৮, ৩৩৭, ৩৩৮ আৰু ১১৪ ধাৰাত গোচৰ ৰুজু কৰা হৈছে । ইতিমধ্যে ক্ৰাইম ব্ৰাঞ্চেও আন বহু অভিযুক্তক আটক কৰিছে বুলি জানিব পৰা গৈছে ৷ আনকি তালুকা আৰক্ষীয়েও ধৃত অভিযুক্তক গ্ৰেপ্তাৰ কৰিবলৈ কঠোৰ ব্যৱস্থা গ্ৰহণ কৰি আছে ৷ গুজৰাটৰ এটা গেমজ’নত সংঘটিত হোৱা এই অগ্নিকাণ্ডত কিশোৰসহ বৰ্তমানলৈকে ৩০ জন লোকৰ মৃত্যু হৈছে ।
একে সময়তে ৰাজকোট গেম জ’নৰ অগ্নিকাণ্ডৰ গোচৰ আদালতৰ মজিয়াত উপনীত হৈছে । ৰাজকোট গেমজ’নত সংঘটিত হোৱা অগ্নিকাণ্ডৰ সন্দৰ্ভত গুজৰাট উচ্চ ন্যায়ালয়ৰ বাৰ এছ’চিয়েশ্যনে নিজাববীয়াকৈ গোচৰ ৰুজু কৰিছে (Suo moto Bar Association) ৷ বাৰ এছ’চিয়েশ্যনৰ মতে গুজৰাটৰ আন ঠাইতো গেমজ’ন আছে । গেমজ’নৰ মালিকৰ অৱহেলাৰ বিৰুদ্ধে ব্যৱস্থা গ্ৰহণ কৰিব লাগে । এই ঘটনাৰ প্ৰতি লক্ষ্য ৰাখি কাইলৈ উচ্চ ন্যায়ালয়ে শুনানি গ্ৰহণ কৰাৰ সম্ভাৱনা আছে ।
আদালতে এই দুৰ্ঘটনাক গুৰুত্বসহকাৰে লৈছে । আদালতে কয় যে এয়া স্বাভাৱিক নহয়, বৰঞ্চ ই মানৱসৃষ্ট দুৰ্যোগ । ঘটনা সন্দৰ্ভত আদালতে কঠোৰ স্থিতি গ্ৰহণ কৰি গেম জ’নৰ আয়োজকৰ গাফিলতিৰ বাবে নিৰীহ লোকৰ প্ৰাণ কাঢ়ি নিলে বুলিও কয় ।
লগতে পঢ়ক: গুজৰাটৰ গেমজ’নত ভয়াবহ অগ্নিকাণ্ড : শিশু-কিশোৰসহ নিহত ২৫ - Gujrat Fire incident
