جے کے ای ڈی آئی کے ڈائریکٹر اعجاز احمد بھٹ نے ترال کے مضافاتی علاقہ نارستان کا دورہ کیا۔ نارستان میں واقع سرکاری ہائی اسکول میں منعقد ایک تقریب میں انہوں نے مہمان خصوصی کے طور پر شرکت کی۔
ترال: طلباء میں بچپن سے ہی کاروباری جذبے اور اختراعی سوچ کو پروان چڑھانے کے لیے جموں و کشمیر انٹرپرینیورشپ ڈیولپمنٹ انسٹی ٹیوٹ (جے کے ای ڈی آئی) نے سنیچر کو مرکز کے زیر انتظام خطہ جموں و کشمیر کے ضلع پلوامہ کے سب ڈسٹرکٹ ترال کے دور افتادہ علاقوں نارستان میں واقع گورنمنٹ ہائی اسکول کے انتظامیہ سے مل کر ایک روزہ انٹرپرینیورشپ بیداری پروگرام کا انعقاد کیا۔
اس تقریب میں جے کے ای ڈی آئی کے ڈائریکٹر اعجاز احمد بھٹ نے بطور مہمان خصوصی شرکت کی۔ جبکہ اسسٹنٹ ایگزیکٹو انجینئر پی ڈی ڈی ترال غلام محمد میر بھی ان کے ہمراہ تھے ۔ اپنے خطاب میں انہوں نے طلباء میں قیادت کا جذبہ پیدا کرنے کے اقدام کی ستائش کی۔ انہوں نے کہا کہ یہ جذبہ طلباء کی مجموعی ترقی کے لیے ایک رہنما فلسفے کے طور پر کام کرتا ہے۔
مزید پڑھیں: Enrollment Drive in Govt Schools محکمہ تعلیم کی جانب سے اونتی پورہ میں انرولمنٹ مہم کا آغاز
انہوں نے واضح کیا کہ کس طرح یو ٹی حکومت کی مختلف پالیسیوں نے کاروبار کے جذبے کو فروغ دیا ہے۔ انہوں نے مزید کہا کہ وقت کی ضرورت ہے کہ والدین میں شعور پیدا کیا جائے تاکہ بچوں میں انٹرپرینیورشپ کلچر کو فروغ دیا جا سکے۔ ڈائریکٹر ای ڈی آئی اعجاز احمد بٹ نے میڈیا کو بتایا کہ نوجوان نسل کو خود روزگار اسکیموں کے متعلق جانکاری فراہم کرنا وقت کی ضرورت ہے اور وہ آگے بھی آگاہی پروگرام ڈگری کالج سطح پر منعقد کریں گے تاکہ اپنے پیروں پر کھڑا ہونے کے لیے نوجوان نسل کو سیکھ دی جائے۔
