چنئی: چنئی سپر کنگز کے کپتان مہندر سنگھ دھونی نے اپنے گیند بازوں سے مایوسی کا اظہار کرتے ہوئے کہا ہے کہ اگر وہ وائیڈز اور نو بالز پر قابو نہیں رکھتے تو انہیں ایک نئے کپتان کے تحت کھیلنا پڑے گا۔ واضح رہے کہ چنئی نے پیر کے روز لکھنؤ سپر جائنٹس کے خلاف 12 رن سے جیت درج کی، حالانکہ ان کے گیند بازوں نے حیرت انگیز طور پر بدنظمی کا مظاہرہ کیا۔ چنئی کے گیند بازوں نے میچ کے دوران 13 وائیڈ اور تین نو بال کی جس سے کپتان دھونی ناخوش رہے۔ دھونی نے میچ کے بعد کہاکہ "باؤلرز کو نو بالز کو ختم کرنا ہوگا اور وائیڈز کو کنٹرول کرنا ہوگا۔ ہم بہت زیادہ اضافی گیندیں پھینک رہے ہیں، ہمیں انہیں کم کرنے کی ضرورت ہے ورنہ وہ (گیند باز) نئے کپتان کے تحت کھیلیں گے۔"
دھونی نے آئی پی ایل کے اس سیزن میں دوسری بار اضافی رنز کے بارے میں تشویش ظاہر کی ہے۔ گجرات ٹائٹنز کے خلاف چنئی کے پہلے میچ میں بھی گیند بازوں نے بے ضابطگی کا مظاہرہ کیا تھا جس پر دھونی غصے میں آگئے تھے۔ چنئی کو گجرات کے خلاف پانچ وکٹوں سے شکست ہوئی تھی، حالانکہ دھونی کی ٹیم نے چیپوک گراؤنڈ میں فتح کا مزہ چکھا۔ دھونی نے ٹورنامنٹ کی اپنی پہلی جیت پر کہاکہ"یہ ایک زبردست میچ تھا۔ ہم سب سوچ رہے تھے کہ وکٹ کیسی ہوگی۔ ہمیں اس کے بارے میں کوئی اندازہ نہیں تھا، لیکن یہاں یہ ایک بڑا اسکور تھا۔ مجموعی طور پر یہ ایک زبردست میچ تھا۔ تقریباً پانچ یا چھ سال بعد اسٹیڈیم بھر گیا تھا۔"