ریاست اترپردیش کے ضلع میرٹھ میں لاک ڈاؤن کے دوران عوام کی پریشانی کو دیکھتے ہوئے انتظامیہ کی جانب سے شہر میں راشن کی تمام دوکانوں کو کھولنے کی اجازت دی گئی ہے۔
لیکن میرٹھ پولیس کی سخت کاروائی کی وجہ سے تاجروں کو مشکل حالات کا سامنا کرنا پڑ رہا ہے، جس سے پریشان ہو کر تاجر اب اپنی دوکانوں کو بند کرکے ان کی چابیاں پولیس کے اعلی افسران کے حوالے کرکے بازار کو مکمل طور سے بند کرنے کی بات کہہ رہے ہیں۔
دراصل میرٹھ شہر کے گھنٹا گھر علاقے میں واقع کوٹلہ بازار شہر میں راشن کی ضرورت کو پورا کرنے والا سب سے بڑا بازار ہے، لیکن لاک ڈاؤن کے نام پر مقامی پولیس اس بازار میں آنے والے تمام راستوں کی ناکہ بندی کر رہی ہے جس کی وجہ سے بازار میں گاہکوں کا آنا بالکل بند ہو گیا ہے۔
پولیس کی اس کاروائی سے ناراض تاجروں نے سڑک کی بندش کے خلاف احتجاج کیا اور کوٹلہ منڈی کا راستہ بند کرنے پر تاجروں نے تھانہ دہلی گیٹ پہنچ کر اپنی دکانوں کی چابیاں اسٹیشن انچارج کے حوالے کردیں۔
تاجروں نے پولیس پر ہراساں کرنے کا الزام عائد کرتے ہوئے کہا کہ پولیس کے کام کرنے کا طریقہ صحیح نہیں ہے۔