బస్సుపై 70 రౌండ్ల కాల్పులు- ఇద్దరు మృతి

అమెరికాలోని కాలిఫోర్నియాలో జరిగిన కాల్పుల ఘటనలో ఇద్దరు టీనేజర్లు ప్రాణాలు కోల్పోయారు. స్నేహితుడి పుట్టినరోజు వేడుకల నుంచి తిరిగి వస్తుండగా దుండగులు కాల్పులు జరిపారు.

అమెరికాలోని కాలిఫోర్నియా రాష్ట్రంలో కాల్పులు స్థానికంగా కలకలం రేపాయి. శాన్​ఫ్రాన్సిస్కో నుంచి ఓక్​లాండ్​ తిరిగి వస్తున్న ఓ పార్టీ బస్సుపై దుండగులు కాల్పులు జరిపిన ఘటనలో ఇద్దరు టీనేజర్లు ప్రాణాలు కోల్పోయారు. ఈ ఘటన సోమవారం అర్ధరాత్రి జరిగింది. స్నేహితుడి పుట్టినరోజు వేడుకల నుంచి తిరిగి వస్తుండగా ఈ దుర్ఘటన చోటుచేసుకున్నట్లు తెలుస్తోంది.

మృతులు ఓక్​లాండ్​కు చెందిన అలాసియా థర్​స్టన్​ (19), మోడెస్టోకు చెందిన జోయ్​ హ్యూస్​ (16)గా అధికారులు గుర్తించారు. ఈ ఘటనలో మరో ఐదుగురు మహిళలు తీవ్రంగా గాయపడ్డారు.

ఓక్​లాండ్​ చేరుకుంటున్న బస్సుపై ఇద్దరు సాయుధులు అకస్మాత్తుగా దాడులు జరిపారని.. బస్సుపై దాదాపు 70 రౌండ్లు కాల్పులు జరిపారని అధికారులు వెల్లడించారు. ఆ తర్వాత అక్కడున్న వీధుల్లో కూడా కాల్పులు జరిపారని తెలిపారు. ఈ ఘటనపై దర్యాప్తు చేపడుతున్నామని పేర్కొన్నారు.

ఇదీ చదవండి :నానో ఫైబర్​ ఫిల్టర్లతో కరోనాకు 100% అడ్డుకట్ట!