CPI Narayana: 'ఎన్డీయేకు వ్యతిరేకంగా కూటమి..రాష్ట్రపతి అభ్యర్థిగా ఆ నేత'

రాష్ట్రపతి ఎన్నికల్లో ప్రతిపక్షపార్టీల అభ్యర్థిగా శరద్​ పవార్​ను బరిలో దించేందుకు ముమ్మర ప్రయత్నాలు జరుగుతున్నాయని సీపీఐ జాతీయ కార్యదర్శి నారాయణ అన్నారు. కేంద్ర ప్రభుత్వ రాక్షస పాలనను అంతం చేసేందుకు భాజపా వ్యతిరేక శక్తులన్నీ ఓ వేదికగా తయారుకావడానికి సన్నద్ధమవుతున్నాయని వెల్లడించారు.

కేంద్ర ప్రభుత్వ రాక్షస పాలనను అంతం చేసేందుకు భాజపా వ్యతిరేక శక్తులన్నీ ఓ వేదికగా తయారు కావడానికి సన్నద్ధమవుతున్నాయని సీపీఐ జాతీయ కార్యదర్శి నారాయణ అన్నారు. 2023లో జరగనున్న రాష్ట్రపతి ఎన్నికల్లో ప్రతిపక్ష పార్టీలు బలపరిచిన అభ్యర్థిని గెలిపించటం ద్వారా కేంద్ర ప్రభుత్వ ప్రజా వ్యతిరేక పాలన పతనానికి నాంది కానుందన్నారు. ఇప్పటికే పలు ప్రాంతీయ పార్టీలు ఎన్డీయే ప్రభుత్వానికి వ్యతిరేకంగా మారుతున్నాయన్నారు. చిన్న చిన్న భిన్నాభిప్రాయాలు ఉన్నప్పటికీ కేంద్ర ప్రభుత్వ పాలనకు వ్యతిరేకంగా ఏకం కావాల్సిన ఆవశ్యకత ఉందన్నారు.

రాష్ట్రపతి ఎన్నికల్లో ప్రతిపక్షపార్టీల అభ్యర్థిగా శరద్​ పవార్​ను బరిలో దించేందుకు ముమ్మర ప్రయత్నాలు జరుగుతున్నాయన్నారు. ప్రజా వ్యతిరేకతను మూటగట్టుకున్న కేంద్ర ప్రభుత్వం ముందు రెండు సవాళ్లున్నాయన్నారు. అందులో ఉత్తరప్రదేశ్ ఎన్నికలు మెుదటిది కాగా, మరొకటి రాష్ట్రపతి ఎన్నికలన్నారు. ఆ రెండింటిలో పరాజయం ద్వారా భాజపా పాలన పతనం ప్రారంభమవుతుందన్నారు

కరోనాను ఎదుర్కోవటంలో కేంద్ర ప్రభుత్వం ఘోరంగా విఫలమైందని చెప్పడానికి కేంద్ర ఆరోగ్యమంత్రిని తప్పించటమే నిదర్శనమన్నారు. కరోనా మరణాలను దాచి కేంద్ర, రాష్ట్ర ప్రభుత్వాలు ఒకేలా వ్యవహరించాయని నారాయణ విమర్శించారు. నూయార్క్ టైమ్స్ నిర్వహించిన అంచనాల్లో దేశంలో 41 లక్షల మంది వైరస్ కారణంగా మృతి చెందినట్లు తేలిందన్నారు. కరోనా బాధిత కుటుంబాలను ఆదుకోవడంలోనూ కేంద్రం దాటవేత ధోరణిని అవలంభిస్తుందన్నారు. ఏపీలో కరోనా మరణాలు దాచిపెడుతున్నారనడానికి తాను స్వయంగా పరిశీలించిన తిరుపతిలోని రుయా ఆసుపత్రి ఉదంతమే నిదర్శనమన్నారు. విశాఖ స్టీల్ ప్లాంట్ ప్రైవేటీకరణ నిలుపుదల చేయాలని ఉపరాష్ట్రపతి వెంకయ్యనాయుడు ఒక్క మాట చెబితే ఆగిపోతుందని నారాయణ అభిప్రాయపడ్డారు.

ఇదీ చదవండి