தென்காசி:தமிழகத்தில் வடகிழக்கு பருவமழை தீவிரமடைந்ததைத் தொடர்ந்து, தமிழகத்தின் பல்வேறு பகுதிகளில் கனமழை பெய்து வருகிறது. அந்த வகையில், தென்காசி மாவட்டத்திலும் கடந்த சில நாட்களாக தொடர் கனமழை பெய்து வருகிறது. இதன் காரணமாக, தென்காசி மாவட்டத்தில் உள்ள கண்மாய்கள், குளங்கள், அணைகள் உள்ளிட்ட நீர்நிலைகள் வெகுவாக உயர்ந்து வருகின்றன. நீர் நிலைகளில் தண்ணீர் வரத்து அதிகரித்து காணப்படுவதால், ஓடைகளில் நீர் பெருக்கெடுத்து ஓடி வருகிறது.
அந்த வகையில், தென்காசி மாவட்டம் குலசேகரமங்கலம் கிராமப் பகுதியில் பெரியகுளம் கண்மாய் உள்ளது. இந்த கண்மாயை நீர் ஆதாரமாகக் கொண்டுதான் 470 ஏக்கர் பரப்பளவில் விவசாயிகள் விவசாயம் செய்து வருகின்றனர். இந்த நிலையில், நேற்று இரவு பெய்த கனமழை காரணமாக, பெரியகுளம் கண்மாய் கரையோர சுற்றுச்சுவர் இடிந்து விழுந்தது. இதில் அதிர்ஷ்டவசமாக யாருக்கும் எந்த பாதிப்பும் ஏற்படவில்லை.