சென்னை: தர்மபுரியைச் சேர்ந்த கண்மணி என்பவர் தாக்கல் செய்துள்ள மனுவில், அவர் வசிக்கும் ஜருகு மானியதஹள்ளி கிராமத்தில் பட்டியல் இனத்தைச் சேர்ந்த ஆதி திராவிடர் வகுப்பைச் சேர்ந்த 400க்கும் மேற்பட்ட குடும்பத்தினர் வசித்து வருவதாகவும், ஒரு கி.மீ தூரத்தில் தங்கள் சமூகத்தினருக்கு ஒதுக்கப்பட்ட தனி மயானத்திற்குச் செல்வதற்கான பாதை முறையாக இல்லை எனவும் குறிப்பிட்டுள்ளார்.
குண்டும் குழியுமாக உள்ள பாதையில் செல்வதால் சில நேரங்களில் பிரேதங்கள் தவறி விழுந்துவிடுவதால், அந்த வழியில் உள்ள விவசாய நிலங்கள் வழியாக எடுத்துச்செல்ல வேண்டிய நிலை நீடிக்கிறது. விவசாய நிலங்கள் பெரும்பாலும் பிற சாதியினருக்கு சொந்தமானது என்பதால், அதில் இறங்கி செல்வதால் அவ்வப்போது சட்ட ஒழுங்கு பிரச்னை எழுவதாகவும் குறிப்பிட்டுள்ளார்.