சென்னை: அண்ணா நகரிலுள்ள அன்னை சத்யா நகர் 10ஆவது தெருவில் வசித்து வந்தவர் மகாலட்சுமி (26). இவரது கணவர் விஜயகுமார், வேலையில்லாமல் வீட்டில் இருந்து வரும் நிலையில், இவர்களுக்கு 2 ஆம் வகுப்பு மற்றும் எல்கேஜி படிக்கும் இரண்டு குழந்தைகள் உள்ளனர். எனவே குடும்பத்தைக் காப்பாற்ற மகாலட்சுமி அண்ணா நகரிலுள்ள தனியார் உடற்பயிற்சி கூடம் ஒன்றில் தூய்மைப் பணியாளராக பணியாற்றி வந்தார்.
கடந்த 2 மாதங்களுக்கு முன் அதே பகுதியிலுள்ள 8ஆவது தெருவில் வசித்து வந்த அண்ணா நகர் காவல் நிலைய சரித்திர பதிவேடு குற்றவாளி ராபர்ட், மகாலட்சுமியிடம் தரக்குறைவாகப் பேசி தனது பாலியல் இச்சையை வெளிப்படுத்தியுள்ளார். மேலும், தனது ஆசைக்கு இணங்க மறுத்தால் கணவர் மற்றும் குழந்தைகளை கொன்றுவிடுவதாக மிரட்டியுள்ளார்.
இது தொடர்பாக அளிக்கப்பட்ட புகாரின் அடிப்படையில் அண்ணா நகர் காவல் துறையினர் ராபர்ட் மீது வழக்குப்பதிவு செய்து கைது செய்து சிறையில் அடைத்தனர். இந்நிலையில் நேற்று (செப்.18) மகாலட்சுமியின் கணவர் விஜயகுமார் தனது உறவினருடன் சகோதரர் மகன் பிறந்தநாள் விழாவிற்காக பத்திரிக்கை வைக்கச் சென்றுவிட்டனர்.
தற்கொலை எதற்கும் தீர்வல்ல இந்நிலையில், மகாலட்சுமிக்கும் அதே தெருவில் வசித்து வரும் அவரது உறவினரான அமுலு என்பவருக்கும் வாய் தகராறு ஏற்பட்டது. தகராறின்போது அமுலு மகாலட்சுமியை ராபர்டுடன் இணைத்து தவறாக சித்தரித்து பேசியதாகக் கூறப்படுகிறது. இதனால் மனவுளைச்சலில் இருந்த மகாலட்சுமி தனது வீட்டிற்குச் சென்று கதவை தாழிட்டுக்கொண்டு வீட்டில் இருந்த தின்னரை உடலில் ஊற்றி தீக்குளித்தார்.
இதனைக் கண்ட அக்கம்பக்கத்தினர் மகாலட்சுமியை மீட்டு சிகிசைக்காக கீழ்ப்பாக்கம் அரசு மருத்துவமனையில் சேர்த்தனர். 90 விழுக்காடு தீக்காயங்களுடன் சிகிச்சைப் பெற்று வந்த மகாலட்சுமி சிகிச்சைப் பலனின்றி உயிரிழந்தார். இச்சம்பவம் தொடர்பாக அண்ணா நகர் காவல் துறையினர், வழக்குப்பதிவு செய்து விசாரணை மேற்கொண்டு வருகின்றனர்.
இதையும் படிங்க:சென்னையில் பிரபல ரவுடி தீக்குளித்து தற்கொலை - மனைவியின் ஓராண்டு நினைவுதினம் முடிந்தவுடன் துயரம்
