சென்னை நெற்குன்றம் பெருமாள் கோயில் பகுதியில் வசிக்கும் மகேஷ்(40), தனது தாயை இரும்புக் கம்பியால் அடித்து கொலை செய்த சம்பவம் அப்பகுதியில் சோகத்தை ஏற்படுத்தியுள்ளது. மதுரை நீதிமன்றத்தில் அலுவலக உதவியாளராக பணிபுரிந்த மகேஷ், கடந்த சில மாதங்களுக்கு முன்னர் பணி நீக்கம் செய்யப்பட்டார்.
அதன் பின்னர் மகேஷ் வேறு வேலைக்கு செல்லாமல் வீட்டிலேயே இருந்திருக்கிறார். அதே வீட்டின் மேல் தளத்தில் இவரது தாயார் ஆதியம்மாள்(65) தனியாக வசித்து வந்தார்.
எப்போதும் அக்கம்பக்கத்தினரிடம் உரையாடும் ஆதியம்மாள் கடந்த 23ஆம் தேதி முதல் வீட்டை விட்டு வெளியே வரவில்லை. ஆதியம்மாள் வெளியே வராததால் சந்தேகமடைந்த அருகிலிருந்த நபர்கள் இன்று காலை காவல் துறையினருக்கு தகவலளித்தனர். அதன் பேரில் விரைந்து வந்த காவல் துறையினர் ஆதியம்மாள் தங்கியிருந்த வீட்டின் பூட்டை உடைத்து பார்த்தனர்.