எச்.வினோத் - கமல்ஹாசன் இணைப்பில் உருவான படம் கைவிடப்பட்டதா? ராஜ்கமல் பிலிம்ஸ் முக்கிய அறிவிப்பு

சென்னை: நடிகர் கமல்ஹாசன் தனது ராஜ்கமல் பிலிம்ஸ் இன்டர்நேஷனல் நிறுவனம் மூலம் சிவகார்த்திகேயன், சிம்பு நடிக்கும் படங்களை தயாரித்து வருகிறார். மேலும் தற்போது இந்தியன் 2, பிரபாஸ் நடிக்கும் கல்கி ஆகிய படங்களில் நடித்து வருகிறார்.

இது மட்டுமில்லாமல் மணிரத்னம் இயக்கத்தில் தக் லைஃப் (thug life) படத்தில் கதாநாயகனாக நடித்து வருகிறார். தக் லைஃப் கமலின் 234வது படமாக உருவாகி வருகிறது. இதற்கு முன்னதாக எச்.வினோத் இயக்கத்தில் கமல் தனது 233வது படத்தில் நடிக்க உள்ளாக அறிவிப்பு வெளியானது. இதற்காக பல மாதங்களாக எச்.வினோத் திரைக்கதை அமைக்கும் பணிகளில் ஈடுபட்டு வந்தார். இந்நிலையில் சமீபத்தில் ராஜ்கமல் பிலிம்ஸ் தயாரிக்கும் படங்களின் பட்டியலை வெளியிட்டது, அதில் எச்.வினோத் இயக்கும் திரைப்படம் இடம் பெறவில்லை.

இதனால் படம் கைவிடப்பட்டதாக தகவல் பரவி வருகிறது. இப்படத்தின் திரைக்கதை கமலுக்கு பிடிக்காததால் பல்வேறு மாற்றங்களை அவர் செய்ய சொன்னதாக கூறப்படுகிறது. இதன் பின்னர், திரைக்கதையில் மாற்றம் செய்து வந்தார் எச்.வினோத். ஆனால், அதுவும் கமலுக்கு திருப்தியாக இல்லாததால் இப்படத்தை கைவிடும் முடிவு எடுக்கப்பட்டதாக தெரிகிறது.

இதையும் படிங்க: 'துள்ளாத மனமும் துள்ளும்' படத்தில் யார் நடித்தாலும் வெற்றிதான் - எஸ்.ஏ.சந்திரசேகர்

எச்.வினோத் திரைப்படம் கைவிடப்பட்டது குறித்து அதிகாரப்பூர்வ அறிவிப்பு எதுவும் வெளியாகவில்லை. மணிரத்னம் இயக்கும் 'தக் லைப்' படத்தில் கமல் நடித்து வரும் நிலையில், எச்.வினோத் அடுத்து நடிகர் தனுஷை இயக்கும் படத்திற்கு தயாராகி வருகிறார் என கோலிவுட் வட்டாரங்களில் கூறப்படுகிறது. மேலும், யோகி பாபுவை வைத்து எச்.வினோத் படம் இயக்கும் திட்டத்தில் உள்ளதாக கூறப்படுகிறது. இந்த இரண்டு படத்திற்கான திரைக்கதை அமைக்கும் பணிகளில் தற்போது எச் வினோத் ஈடுபட்டுள்ளார்.

தமிழ் சினிமாவில் சதுரங்க வேட்டை, தீரன் அதிகாரம் ஒன்று உள்ளிட்ட வெற்றி படங்களை இயக்கிய எச்.வினோத், தற்போது முன்னணி நடிகர்களால் கைவிடப்பட்ட நிலையில் உள்ளதாகவும், கமலை நம்பி இத்தனை நாட்கள் காத்திருந்த எச்.வினோத்திற்கு கமலின் இந்த முடிவு ஏமாற்றத்தை கொடுத்துள்ளதாகவும் கோலிவுட் வட்டாரத்தில் பேசு பொருளாக உள்ளது.

இதையும் படிங்க: கேப்டன் விஜயகாந்த் எனக்கு அப்பா..! - ஆர்.கே.செல்வமணி உருக்கம்