ਨਵੀਂ ਦਿੱਲੀ :ਕਮਜ਼ੋਰ ਗਲੋਬਲ ਸੰਕੇਤਾਂ ਵਿਚਾਲੇ ਬੁੱਧਵਾਰ ਨੂੰ ਰਾਸ਼ਟਰੀ ਰਾਜਧਾਨੀ ਦੇ ਸਰਾਫਾ ਬਜ਼ਾਰ ਵਿੱਚ ਸੋਨਾ 300 ਰੁਪਏ ਡਿੱਗ ਕੇ 59, 600 ਰੁਪਏ ਪ੍ਰਤੀ 10 ਗ੍ਰਾਮ ਉੱਤੇ ਆ ਗਿਆ। HDFC ਸਕਿਊਰਿਟੀ ਨੇ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ। ਪਿਛਲੇ ਕਾਰੋਬਾਰੀ ਸੈਸ਼ਨ ਵਿੱਚ ਸੋਨਾ 59, 900 ਰੁਪਏ ਪ੍ਰਤੀ ਗ੍ਰਾਮ ਉੱਤੇ ਬੰਦ ਹੋਇਆ ਸੀ। ਚਾਂਦੀ ਦੀ ਕੀਮਤ ਵੀ 400 ਰੁਪਏ ਡਿੱਗ ਕੇ 74,100 ਰੁਪਏ ਪ੍ਰਤੀ ਕਿਲੋਗ੍ਰਾਮ ਉੱਤੇ ਆ ਗਈ ਹੈ। ਕੌਮਾਂਤਰੀ ਬਾਜ਼ਾਰ ਵਿੱਚ ਸੋਨਾ 1,897 ਡਾਲਰ ਪ੍ਰਤੀ ਔਂਸ ਉੱਤੇ (Gold Silver Price Today) ਆ ਗਿਆ।
ਚਾਂਦੀ ਦੀ ਕੀਮਤ :ਚਾਂਦੀ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਦਰਜ ਹੋਈ ਹੈ, ਜੋ ਕਿ 22.80 ਡਾਲਰ ਪ੍ਰਤੀ ਔਂਸ ਉੱਤੇ ਆਈ ਹੈ। HDFC ਸਕਿਊਰਿਟੀਜ਼ ਦੇ ਸੀਨੀਅਰ ਮਾਹਿਰ-ਵਸਤੂਆਂ ਦੇ ਵਿਸ਼ਲੇਸ਼ਕ ਸੌਮਿਲ ਗਾਂਧੀ ਨੇ ਕਿਹਾ ਕਿ ਅਮਰੀਕੀ ਫੈਡਰਲ ਰਿਜ਼ਰਵ ਵਲੋਂ ਵਿਆਜ ਦਰਾਂ ਲੰਬੇ ਸਮਾਂ ਤੱਕ ਉੱਚੀਆਂ ਰਹਿਣ ਦੇ ਸਖ਼ਤ ਸੰਕੇਤ ਦੇਣ ਤੋਂ ਬਾਅਦ ਡਾਲਰ ਮਜ਼ਬੂਤ ਹੋਇਆ ਅਤੇ 10 ਮਹੀਨਿਆਂ ਦੇ ਨਵੇਂ ਉੱਚੇ ਪੱਧਰ ਉੱਤੇ ਪਹੁੰਚ ਗਿਆ।
ਰੁਪਏ 'ਚ ਲਗਾਤਾਰ ਗਿਰਾਵਟ ਰੁਕੀ: ਦੋ ਦਿਨਾਂ ਦੀ ਲਗਾਤਾਰ ਗਿਰਾਵਟ ਤੋਂ ਬਾਅਦ ਬੁੱਧਵਾਰ ਨੂੰ ਰੁਪਏ 'ਚ ਸੁਧਾਰ ਦੇਖਣ ਨੂੰ ਮਿਲਿਆ। ਅੰਤਰਬੈਂਕ ਵਿਦੇਸ਼ੀ ਮੁਦਰਾ ਬਾਜ਼ਾਰ ਵਿੱਚ, ਰੁਪਿਆ ਛੇ ਪੈਸੇ ਮਜ਼ਬੂਤ ਹੋਇਆ ਅਤੇ ਅਮਰੀਕੀ ਡਾਲਰ ਦੇ ਮੁਕਾਬਲੇ 83.22 ਦੇ ਪੱਧਰ 'ਤੇ ਬੰਦ ਹੋਇਆ। ਸਥਾਨਕ ਸ਼ੇਅਰ ਬਾਜ਼ਾਰ 'ਚ ਮਜ਼ਬੂਤੀ ਦੇ ਰੁਖ ਨੇ ਵੀ ਰੁਪਏ ਦੀ ਧਾਰਨਾ ਨੂੰ ਹੁਲਾਰਾ ਦਿੱਤਾ। ਬਾਜ਼ਾਰ ਸੂਤਰਾਂ ਨੇ ਕਿਹਾ ਕਿ ਹਾਲਾਂਕਿ ਅਮਰੀਕੀ ਮੁਦਰਾ ਦੇ ਉੱਚ ਪੱਧਰ ਅਤੇ ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਦੇ ਵਿਚਕਾਰ ਵਿਦੇਸ਼ੀ ਨਿਵੇਸ਼ਕਾਂ ਦੀ ਵਿਕਰੀ ਦਾ ਦਬਾਅ ਰੁਪਏ 'ਤੇ ਬਣਿਆ ਰਿਹਾ ਅਤੇ ਇਸ ਨਾਲ ਭਾਰਤੀ ਮੁਦਰਾ ਦੇ ਵਾਧੇ 'ਤੇ ਕੁਝ ਰੋਕ ਲੱਗੀ।
ਰੁਪਿਆ ਬਨਾਮ ਡਾਲਰ : ਅੰਤਰਬੈਂਕ ਵਿਦੇਸ਼ੀ ਮੁਦਰਾ ਬਾਜ਼ਾਰ 'ਚ ਰੁਪਿਆ ਡਾਲਰ ਦੇ ਮੁਕਾਬਲੇ 83.23 'ਤੇ ਖੁੱਲ੍ਹਿਆ। ਦਿਨ ਦੇ ਕਾਰੋਬਾਰ ਦੌਰਾਨ ਇਹ 83.18 ਅਤੇ 83.24 ਦੇ ਵਿਚਕਾਰ ਰਿਹਾ। ਆਖਰਕਾਰ ਇਹ ਛੇ ਪੈਸੇ ਦੇ ਵਾਧੇ ਨਾਲ 83.22 ਪ੍ਰਤੀ ਡਾਲਰ 'ਤੇ ਬੰਦ ਹੋਇਆ। ਪਿਛਲੇ ਦੋ ਸੈਸ਼ਨਾਂ 'ਚ ਰੁਪਿਆ 34 ਪੈਸੇ ਡਿੱਗਿਆ ਸੀ। ਸੋਮਵਾਰ ਨੂੰ 19 ਪੈਸੇ ਦੀ ਗਿਰਾਵਟ ਦਰਜ ਕਰਨ ਦੇ ਇਕ ਦਿਨ ਬਾਅਦ, ਇਹ 15 ਪੈਸੇ ਡਿੱਗ ਕੇ ਮੰਗਲਵਾਰ ਨੂੰ 83.28 'ਤੇ ਬੰਦ ਹੋਇਆ। ਅਮਰੀਕਾ 'ਚ ਬਾਂਡ ਯੀਲਡ 'ਚ ਰਿਕਾਰਡ ਵਾਧੇ ਦੇ ਦੌਰਾਨ ਡਾਲਰ ਦੇ ਮਜ਼ਬੂਤ ਹੋਣ ਨਾਲ ਰੁਪਏ 'ਚ ਗਿਰਾਵਟ ਦਰਜ ਕੀਤੀ ਗਈ।
ਇਸ ਦੌਰਾਨ, ਡਾਲਰ ਸੂਚਕਾਂਕ, ਜੋ ਛੇ ਪ੍ਰਮੁੱਖ ਮੁਦਰਾਵਾਂ ਦੇ ਮੁਕਾਬਲੇ ਅਮਰੀਕੀ ਡਾਲਰ ਦੀ ਸਥਿਤੀ ਨੂੰ ਮਾਪਦਾ ਹੈ, 0.05 ਫੀਸਦੀ ਵਧ ਕੇ 106.28 'ਤੇ ਪਹੁੰਚ ਗਿਆ। ਗਲੋਬਲ ਆਇਲ ਬੈਂਚਮਾਰਕ ਬ੍ਰੈਂਟ ਕਰੂਡ ਫਿਊਚਰਜ਼ 0.87 ਫੀਸਦੀ ਵਧ ਕੇ 94.78 ਡਾਲਰ ਪ੍ਰਤੀ ਬੈਰਲ 'ਤੇ ਕਾਰੋਬਾਰ ਕਰ ਰਿਹਾ ਸੀ। ਸਥਾਨਕ ਸ਼ੇਅਰ ਬਾਜ਼ਾਰਾਂ 'ਚ ਬੀ.ਐੱਸ.ਈ. ਦਾ 30 ਸ਼ੇਅਰਾਂ ਵਾਲਾ ਸੈਂਸੈਕਸ 173.22 ਅੰਕਾਂ ਦੀ ਤੇਜ਼ੀ ਨਾਲ 66,118.69 'ਤੇ ਬੰਦ ਹੋਇਆ। ਸਟਾਕ ਮਾਰਕੀਟ ਦੇ ਅੰਕੜਿਆਂ ਦੇ ਅਨੁਸਾਰ, ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕ (ਐਫਆਈਆਈ) ਪੂੰਜੀ ਬਾਜ਼ਾਰ ਵਿੱਚ ਸ਼ੁੱਧ ਵਿਕਰੇਤਾ ਸਨ। ਉਸ ਨੇ ਬੁੱਧਵਾਰ ਨੂੰ ਕੁੱਲ 354.35 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ।
