ବାରିପଦା: ପ୍ରକୃତ ପ୍ରେମରେ ନଥାଏ କିଛି ବି ମାପଦଣ୍ଡ । ଶାରୀରିକ ଅକ୍ଷମତା କେମିତି ବା ସାଜିପାରିବ ପ୍ରତିବନ୍ଧକ । ମାରୁଆଡି ମନ୍ଦିରରେ ଅନୁଷ୍ଠିତ ହୋଇଛି ଏକ ନିଆରା ବାହାଘର। ଜଣେ ଦିବ୍ୟାଙ୍ଗ ଯୁବକଙ୍କୁ ମନର ମଣିଷ ବାଛିବା ପରେ ଚର୍ଚ୍ଚାରେ ଏହି ପ୍ରେମ କାହାଣୀ ।
ମୟୁରଭଞ୍ଜ ମରୋଡା ବ୍ଲକ ମାଳିହତା ଗାଁର ଦିବ୍ୟାଙ୍ଗ ତାପସଙ୍କ ହାତ ଧରିଲେ କବିତା। ମାଳିହତା ଗ୍ରାମର ତାପସ କୁମାର ରାଉତ, ବାଲେଶ୍ଵର ଜିଲ୍ଲା ଜଳେଶ୍ଵରର ହାତୀଗଡ଼ ସ୍ଥିତ କବିତା ସିଂଙ୍କ ସହିତ ବିବାହ ବନ୍ଧନରେ ବାନ୍ଧି ହୋଇଛନ୍ତି। କବିତା ଅନୁସୂଚିତ ଜନଜାତିର ଓ ତାପସ ସାଧାରଣ ବର୍ଗର ବୋଲି ଜଣାପଡ଼ିଛି। ଦୁହିଁଙ୍କ ମଧ୍ୟରେ ଗତ ୩ ମାସ ହେଲା ପ୍ରେମ ସମ୍ପର୍କ ଗଢ଼ି ଉଠିଥିଲା ।
ପରେ ସେମାନେ ବିବାହ କରିବାକୁ ନିଷ୍ପତ୍ତି ନେଇଥିଲେ। ଫଳରେ ବାରିପଦାସ୍ଥିତ ମାରୱାଡି ମନ୍ଦିରରେ ଦୁହିଁଙ୍କ ବିବାହ ଅନୁଷ୍ଠିତ ହୋଇଛି । ଏହି ବିବାହ ଦେଖିବା ପାଇଁ ମନ୍ଦିରରେ ଲୋକଙ୍କ ଭିଡ଼ ଦେଖିବାକୁ ମିଳିଥିଲା ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
