ମାଲକାନଗିରି:ଉପର ପଲସ୍ତରା ଛାଡି ରଡ୍ ଦେଖାଯାଉଛି । ବ୍ରିଜ ଉପରେ ବଡ ଗାତ ସୃଷ୍ଟି ହେଲାଣି । ହେଲେ ସେହି ଗାତକୁ ମରାମତି କରାଯାଉଛି ନା ନୂତନ ବ୍ରିଜ ନିର୍ମାଣ ହୋଇପାରୁଛି । କିନ୍ତୁ ପ୍ରଶାସନ କେବଳ ଫଳକ ମାରି କାମ ସାରିଦେଇଛି। ଏଭଳି ଦୃଶ୍ୟ ଦେଖିବାକୁ ମିଳିଛି ମାଲାକନଗିରି ଜିଲ୍ଲା କାଲିମେଳା ବ୍ଲକ ଅନ୍ତର୍ଗତ ପୋଟେରୁ ବ୍ରିଜରେ। ଏହି ବ୍ରିଜ ସମେତ ଜିଲ୍ଲାର ୫ଟି ବ୍ରିଜ ନିର୍ମାଣ ପାଇଁ ଟେଣ୍ଡର ସରିଛି ସତ କିନ୍ତୁ କାମ ଆରମ୍ଭ ହୋଇପାରୁ ନାହିଁ। ବ୍ରିଜ ଦେଇ ବିପଦଶଙ୍କୁଳ ଅବସ୍ଥାରେ ପ୍ରତିଦିନ ଶହ ଶହ ଗାଡି ଆନ୍ଧ୍ରପ୍ରଦେଶ ଓ ତେଲେଙ୍ଗାନାକୁ ଯାତୟତ କରୁଛି।
ଜିଲ୍ଲାରେ ୩୨୬ ନମ୍ବର ଜାତୀୟ ରାଜପଥ ଉପରେ ମାଥିଲି ବ୍ଳକର ପାଙ୍ଗାମ୍ ଓ କାଲିମେଳା ବ୍ଲକର ପୋଟେରୁ, ଏମଭି ୯୦, ଏମଭି ୯୬ ଓ କାଙ୍ଗରୁକୋଣ୍ଡାରେ ବ୍ରିଜ ରହିଛି । ପୋଟେରୁ ବ୍ରିଜର ଦୁଇ ପାର୍ଶ୍ବରୁ କେତେକ ସ୍ଥାନରେ ଭାଙ୍ଗି ଯାଇଥିବା ବେଳେ ଉପରକୁ ପଲସ୍ତରା ଛାଡିଯାଇଥିବା ବେଳେ ସେଠାରେ ପ୍ରଶାସନ ପକ୍ଷରୁ ବୋର୍ଡ ଲଗାଯାଇଛି ଯେ, 'ଦୁର୍ବଳ ପୋଲ ଗାଡି ଧୀରେ ଚଲାନ୍ତୁ’ । ଏଭଳି ଏକ ବୋର୍ଡକୁ ଲଗାଇ ଦେଇ ପ୍ରଶାସନ ତାର କାମ ସାରିଦେଇଛି । ଏନେଇ ମାଲକାନଗିରି ବିଧାୟକ ଆଦିତ୍ୟ ମାଡି ବାରମ୍ବାର ବିଧାନସଭାରେ ଆଲୋଚନା କରିଥିଲେ । ତା ସହ ଗତ ୨୦୨୨ ମସିହାରେ ଲୋକସଭା ଅଧିବେଶନରେ ନବରଙ୍ଗପୁର ସାଂସଦ ରମେଶଚନ୍ଦ୍ର ମାଝୀ ଏହି ସମସ୍ୟାକୁ ନେଇ ପ୍ରଶ୍ନ କରିଥିଲେ । ଏଥିସହ ମାଲକାନଗିରି ଜିଲ୍ଲାରେ ଥିବା ତଳୁଆ ବ୍ରିଜ୍ଗୁଡିକୁ ହାଇ ଲେବୁଲ୍ ବ୍ରିଜ୍ କରିବା ପାଇଁ ଲୋକସଭାରେ ଜାତୀୟ ରାଜପଥ ବିଭାଗ ମନ୍ତ୍ରୀ ନିତିନ୍ ଗଡକରୀଙ୍କୁ ପ୍ରସ୍ତାବ ଦେଇଥିଲେ ।
ତେବେ ୩୨୬ ନମ୍ବର ଜାତୀୟ ରାଜପଥ ଉପରେ ପାଙ୍ଗାମ, ପୋଟେରୁ, ଏମଭି୯୦, ଏମଭି ୯୫ ଓ କାଙ୍ଗୁରକୋଣ୍ଡା ଠାରେ ୫ଟି ଉଚ୍ଚ ବ୍ରିଜ ନିର୍ମାଣ କରାଯିବ। ଏଥିପାଇଁ ଖର୍ଚ୍ଚ ହେବ ୭୯ କୋଟି ୮୨ ଲକ୍ଷ ଟଙ୍କା । ଏହି ୫ଟି ବ୍ରିଜ ନିର୍ମାଣ ପାଇଁ ଛତିଶଗଡ ରାଜ୍ୟ ବିଳାସପୁରର ଏମଏସ୍ ବ୍ରିଜେଶ ଅଗ୍ରୱାଲ ନାମକ ଠିକା ସଂସ୍ଥା ଟେଣ୍ଡର ପାଇଛି । ୨୦୨୨ ମସିହା ଜୁଲାଇ ୨ ତାରିଖରୁ ଟେଣ୍ଡର ଆଗ୍ରିମେଣ୍ଟ ହୋଇସାରିଛି । କିନ୍ତୁ ଗୋଟିଏ ବି ବ୍ରିଜ କାମ ଆରମ୍ଭ ହୋଇପାରିନାହିଁ । ଯାହାକୁ ନେଇ ସ୍ଥାନୀୟ ଜନସାଧାରଣ ପ୍ରଶ୍ନ ଉଠାଇଛନ୍ତି । ତାସହ ଏହି ବ୍ରିଜ୍ କାମ ନେଇ ଓଡିଶା ସରକାରଙ୍କ ଉପରେ ବର୍ଷିଛନ୍ତି ମାଲକାନଗିରି ବିଧାୟକ । ଏଥିସହ ପୁରୁଣା ବ୍ରିଜର ପାର୍ଶ୍ବରେ ନୂତନ ବ୍ରିଜ ସହ ଆପ୍ରୋଚ ରୋଡ୍ ନିର୍ମାଣ କରାଯିବ ବୋଲି ସୂଚନା ଦେଇଛନ୍ତି ଜାତୀୟ ରାଜପଥ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ।