ଭୁବନେଶ୍ବର:ନକଲି ବିଜ୍ଞପ୍ତିରେ ସରକାରୀ ଚାକିରି ନିଯୁ୍କ୍ତି ଆଳରେ ଠକେଇ କରୁଥିବା କିଶୋର ମିଶ୍ରର ସହଯୋଗୀ କାହ୍ନୁ ଚରଣ ପ୍ରଧାନକୁ ଗିରଫ କରିଛି STF । ତା' ନିକଟରୁ ଏକାଧିକ ନକଲି ସରକାରୀ ବିଜ୍ଞପ୍ତି ଚିଠି ଜବତ ହୋଇଛି । ରାଜ୍ୟବ୍ୟାପୀ ଏହି ନିଯୁକ୍ତି ସ୍କାମର ଚେର ଲମ୍ବିଥିବା ସନ୍ଦେହ କରୁଛି ପୋଲିସ । ଏନେଇ ସମସ୍ତ ଜିଲ୍ଲାର ଏସ୍ପିଙ୍କୁ ଏପରି ଠକେଇ ଘଟଣା ସମ୍ପର୍କରେ ଅଭିଯୋଗ ଥିଲେ ଜଣାଇବାକୁ ନିର୍ଦ୍ଦେଶନାମା ଜାରି ହୋଇଛି । କେତେବେଳେ ସୂଚନା ଅଧିକାର କର୍ମୀ ନାଁ ନେଇ ତ ଆଉ କେତେବେଳେ ଅନ୍ୟ ପରିଚୟ ଦେଇ ଏହି ଗ୍ୟାଙ୍ଗ୍ ଠକେଇ କରୁଥିବା ନଜିର ରହିଛି ।
ଏହାସହ ଅଭିଯୁକ୍ତ ନିକଟରୁ ଏକାଧିକ ନକଲି ସରକାରୀ ବିଜ୍ଞପ୍ତି ଚିଠି ଜବତ ହୋଇଥିବା ନେଇ ଏସ୍ଟିଏଫ୍ ଏସ୍ପି ପ୍ରେସମିଟ୍ ଜରିଆରେ ସୂଚନା ଦେଇଛନ୍ତି । ଏସ୍ଟିଏଫ୍ ଏସ୍ପି କିଶୋର ଚନ୍ଦ୍ର ପାଣିଗ୍ରାହୀ କହିଛନ୍ତି,"ଚାନ୍ଦପୁର ଥାନାରେ ୪ରୁ ଉର୍ଦ୍ଧ୍ବ କେସ ସମେତ ଏସଟିଏଫ କେସ ମଧ୍ୟ ଯୋଡି ହୋଇଛି। ତେବେ କାହ୍ନୁ ପୂର୍ବରୁ ଗିରଫ ହୋଇଥିବା କିଶୋର ମିଶ୍ରର ଖାସ୍ ସହଯୋଗୀ ଥିବା ଜଣାପଡୁଛି । ସେ ନିଜକୁ କେତେବେଳେ ଆରଟିଆଇ ଆକ୍ଟିଭିଷ୍ଟର ପରିଚୟ ତ କେତେବେଳେ ବିଭିନ୍ନ ସରକାରୀ ବିଭାଗର ସହଯୋଗୀ ନିର୍ଦ୍ଦେଶକଙ୍କ ପରିଚୟ ଦେଇ ଏକାଧିକ ଲୋକଙ୍କୁ ଠକାମୀ କରି ଆସୁଥିଲା ଅଭିଯୁକ୍ତ ।"
ଏପରିକି ସରକାରୀ ଚାକିରିଆଙ୍କୁ ଟ୍ରାନ୍ସଫର୍ କରାଇ ଦେବାର ପ୍ରତିଶୃତି ଦେଇ ଠକାମୀ କରାଯାଉଥିଲା । ଏହାସହ ଏମାନେ ସରକାରୀ କାର୍ଯ୍ୟାଳୟରେ ବ୍ଲାକମେଲ୍ ଓ ଧମକଚମକ ଦେଇ ଠକାମୀ କରିଛନ୍ତି । ଏପରିିକି ଏକାଧିକ ଲୋକଙ୍କୁ ସରକାରୀ ଚାକିରି କରାଇଦେବାର ପ୍ରତିଶୃତି ଦେଇ ଠକିଥିବା ନେଇ ଏସଟିଏଫକୁ ସୂଚନା ମିଳିଥିଲା । କାହ୍ନୁ ନାଁରେ ସରକାରୀ କର୍ମଚାରୀଙ୍କୁ ଧମକ ଚମକ ଦେବା, ଠକିବା ଓ ଗଣ୍ଡଗୋଳ ମାରପିଟ୍ ଭଳି ଦଙ୍ଗାମୂଳକ ପରିସ୍ଥିତି ସୃଷ୍ଟି କରିବା ଭଳି ଅଭିଯୋଗ ଚାନ୍ଦପୁର ଥାନାରେ ରହିଛି । ଏପରିକି କିଛି ଦିନ ଧରି ସେ ପୋଲିସ ରାଡାରରେ ଥିବାବେଳେ ଗିରଫ ହେବା ଭୟରେ ଥାଇଲାଣ୍ଡରେ ଲୁଚି ରହିଥିଲା ଅଭିଯୁକ୍ତ ।