କେନ୍ଦ୍ରାପଡ଼ା:ଜିଲ୍ଲାର ଜଣେ ଯୁବକଙ୍କ ସାହସିକତାକୁ ନେଇ ହେଉଛି ଚର୍ଚ୍ଚା । ଦୁର୍ବୃତ୍ତଙ୍କ ସହ ଲଢ଼ି ଦୀର୍ଘ ୪୦ କିଲୋମିଟର ପିଛା କରି ଲୁଟେରାଙ୍କୁ କାବୁ କରିବାକୁ ପ୍ରୟାସ କରିଥିଲେ ଯୁବକ ଜଣକ । ପ୍ରୟାସରେ ବିଫଳ ହୋଇଥିଲେ ହେଁ ଏଭଳି ସାହସିକତା ପାଇଁ ବିଭିନ୍ନ ମହଲରୁ ତାଙ୍କ ପ୍ରତି ଶୁଭେଚ୍ଛାର ସୁଅ ଛୁଟୁଛି । ଏହାସହ ପୋଲିସର ପାଟ୍ରୋଲିଂ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ଗତ ସୋମବାର ସନ୍ଧ୍ୟାରେ ସଦର ଥାନା ଅନ୍ତର୍ଗତ ଖଇରାବାଦ ଗାଁର ପ୍ରକାଶ ନାୟକ ନିତିଦିନ ଭଳି ଜମଧରସ୍ଥିତ ଜିମ୍ ସେଣ୍ଟରକୁ ବ୍ୟାୟାମ କରିବା ପାଇଁ ଯାଉଥିଲେ । ଏହି ସମୟରେ କଟକ-ଚାନ୍ଦବାଲି ରାଜ୍ୟ ରାଜପଥ ରାସ୍ତା ଦୁହୁରିଆ ଫାଣ୍ଡିଠାରୁ ମାତ୍ର ୫୦ ମିଟର ଦୂରରେ ଥିବା ହମ୍ପ୍ସ୍ ନିକଟରେ ଚଳାଉଥିବା ନିଜ ବୁଲେଟକୁ ସ୍ଲୋ କରିଥିଲେ । ଏହି ସମୟରେ ଏକ ନୀଳ ରଙ୍ଗର ଗ୍ଲାମର ଗାଡି ନଂ OD29F 1777ରେ ପିଛା କରି ଆସୁଥିବା ୨ଜଣ ଦୁର୍ବୃତ୍ତ ପ୍ରକାଶ ପିନ୍ଧିଥିବା ୪୦ଗ୍ରାମ ଓଜନର ଏକ ସୁନାଚେନକୁ ତାଙ୍କ ବେକରୁ ଝାମ୍ପି ନେଇଥିଲେ ।
ପ୍ରକାଶ ସୁନା ଚେନକୁ ବଞ୍ଚାଇବାକୁ ଯାଇ ଦୁର୍ବୃତ୍ତଙ୍କ ଗାଡିକୁ ଗୋଇଠା ମାରିବା ବେଳେ ଦୁର୍ବୃତ୍ତମାନେ ପ୍ରକାଶଙ୍କୁ ଏକ ଲୁହା ପାଇପରେ ଆକ୍ରମଣ କରିଥିଲେ । ପରେ ଦୁର୍ବୃତ୍ତ ଦ୍ବୟ ସେମାନଙ୍କ ଗ୍ଲାମର ଗାଡିକୁ ଦ୍ରୁତ ଗତିରେ ଜାତୀୟ ରାଜପଥ ଉପରକୁ ଆଣି ଛୁ ମାରିଥିଲେ। ତେବେ ଆକ୍ରମଣକୁ ଡରି ନଯାଇ ପ୍ରକାଶ ସେମାନଙ୍କ ପିଛା କରୁଥିବା ଦେଖି ଦୁର୍ବୃତ୍ତମାନେ ଗୁଳି ଚଳାଇଥିଲେ । ବିଭିନ୍ନ ଛକ ଜାଗାରେ ପ୍ରକାଶ ପାଟି କରି ଦୁର୍ବୃତ୍ତଙ୍କୁ ଧରିବାକୁ ଲୋକଙ୍କୁ କହୁଥିବା ବେଳେ ଦୁର୍ବୃତ୍ତମାନେ ଗୁଳି ଚଳାଉଥିବାରୁ କେହି ସେମାନଙ୍କ ପଛରେ ଯିବାକୁ ସାହସ କରି ନଥିଲେ।