ବୌଦ୍ଧ: ଜିଲ୍ଲାର ବିଭିନ୍ନ ସ୍ଥାନରେ ବୃଦ୍ଧି ପାଇବାରେ ଲାଗିଛି ସର୍ପାଘାତଜନିତ ମାମଲା । ପ୍ରତ୍ୟେକ ବର୍ଷ ବର୍ଷା ଋତୁରେ ସର୍ପ ଦଂଶନ ମାମଲା ଦେଖିବାକୁ ମିଳିଥାଏ । ମାତ୍ର ଚଳିତ ବର୍ଷା ସର୍ପାଘାତଜନିତ ମାମଲା ବୃଦ୍ଧି ପାଇଛି । ଏହାସହ ଜନସଚେତନତା ଅଭାବରୁ ଅନେକ ସ୍ଥାନରେ ରୋଗୀକୁ ଡାକ୍ତରଖାନାରେ ଚିକିତ୍ସା କରାନଯାଇ ଝଡ଼ା ଫୁଙ୍କାର ସହାୟତା ନିଆଯାଉଥିବାରୁ ରୋଗୀଙ୍କ ମୃତ୍ୟୁ ଘଟୁଥିବା ବିଶେଷଜ୍ଞ ଡାକ୍ତର ମତପ୍ରକାଶ କରିଛନ୍ତି । ମହାନଦୀ କୂଳରେ ଅବସ୍ଥିତ ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ ବର୍ଷା ଋତୁରେ ବିଶେଷ ଭାବରେ ମହାନଦୀରେ ବନ୍ୟାଜଳ ପ୍ରବାହିତ ହେଉଥିବା ସମୟରେ ନଦୀ କୂଳିଆ ଅଞ୍ଚଳରେ ଥିବା ଜନବସତି ଗୁଡ଼ିକରେ ବିଭିନ୍ନ ପ୍ରକାରର ବିଷଧର ସାପ ଦେଖିବାକୁ ମିଳିଥାଏ ।
ଏହା ବି ପଢନ୍ତୁ: ଶୋଇଥିବା ସମୟରେ ଚୋଟ ମାରିଲା ସାପ, ଆଖି ବୁଜିଲା ନାବାଳକ
ଛୋଟରୁ ନେଇ ବଡ଼ ପର୍ଯ୍ୟନ୍ତ ନାଗ, ଚିତ୍ତି, ଗୋଖର ପ୍ରଜାତିର ବିଭିନ୍ନ ବିଷଧର ସାପ ଦେଖିବାକୁ ମିଳିଥାଏ । ଆଉ ବର୍ଷା ଋତୁରେ ପ୍ରାୟ ଦିନ ସର୍ପାଘାତ ମାମଲା ପରିଲକ୍ଷିତ ହୋଇଥାଏ । ସର୍ପାଘାତ ସମୟରେ ଜିଲ୍ଲାର ପ୍ରାଣୀ କଲ୍ୟାଣ ମଞ୍ଚର ଏକ ବଡ଼ ଭୂମିକା ରହି ଆସିଛି । ପ୍ରାଣୀ କଲ୍ୟାଣ ମଞ୍ଚର ସଦସ୍ୟମାନେ ନଦୀ କୂଳିଆ ଅଞ୍ଚଳରେ ପହଞ୍ଚି ଲୋକଙ୍କ ମଧ୍ୟରେ ସର୍ପାଘାତକୁ ନେଇ ଜନସଚେତନତା ସୃଷ୍ଟି କରିବା ସହିତ ବିଭିନ୍ନ ସମୟରେ ବିଷଧର ସାପକୁ ଉଦ୍ଧାର କରି ସେମାନଙ୍କୁ ସୁରକ୍ଷିତ ଜଙ୍ଗଲରେ ଛାଡୁଛନ୍ତି ।