ମେଲବର୍ଣ୍ଣ : ସୁପର ୧୨ ପର୍ଯ୍ୟାୟରେ ଚାଲିଛି ସୁପର ଫାଇଟ । ଆସନ୍ତାକାଲି ( ବୁଧବାର ) ମୁହାଁମୁହିଁ ହେବେ ଇଂଲଣ୍ଡ ଏବଂ ଆୟରଲାଣ୍ଡ । ତେବେ ଇଂଲଣ୍ଡର ପଲ୍ଲା ଭାରୀ ରହିଥିବା ବେଳେ ଆୟରଲାଣ୍ଡ ମଧ୍ୟ ମ୍ୟାଚ ହାତେଇବା ପାଇଁ ଅପ୍ରାଣ ଉଦ୍ୟମ ଜାରି ରଖିବ । ଆୟରଲାଣ୍ଡ ସୁପର ୧୨ ପର୍ଯ୍ୟାୟର ପ୍ରଥମ ମ୍ୟାଚ ଶ୍ରୀଲଙ୍କାଠାରୁ ପରାସ୍ତ ହୋଇଥିଲା । ତେଣୁ ଏଣ୍ଡ୍ରୁ ବଲବର୍ଣ୍ଣିଙ୍କ ଦଳ ନିଶ୍ଚିତ ଭାବରେ ଇଂଲଣ୍ଡକୁ ହରାଇବା ପାଇଁ ସ୍ବତନ୍ତ୍ର ରଣନୀତି ପ୍ରସ୍ତୁତ କରିବ । ସେପଟେ ଜୋସ ବଟଲର ଟିମ ବିଶ୍ବକପରେ ବିଜୟରୁ ଅଭିଯାନ କରିଛି । ଏହି ବିଜୟ ଧାରା ବଜାୟ ରଖିବାକୁ ଲକ୍ଷ୍ୟ ନେଇ ମଇଦାନକୁ ଓହ୍ଲାଇବ ଇଂଲଣ୍ଡ ।
ଆସନ୍ତାକାଲି ଭାରତୀୟ ସମୟ ୯.୩୦ AM ରେ ମେଲବର୍ଣ୍ଣ କ୍ରିକେଟ ଗ୍ରାଉଣ୍ଡରେ ଉଭୟ ଦଳ ମୁହାଁମୁହିଁ ହେବେ । ଦୁଇ ଦଳ ମଧ୍ୟରୁ ଇଂଲଣ୍ଡର ପଲ୍ଲା ଭାରି ରହିଛି । ଆୟରଲାଣ୍ଡକୁ ମ୍ୟାଚ ଜିତିବାକୁ ହେଲେ କର ବା ମର ସ୍ଥିତି ଆପଣାଇବାକୁ ହେବ । ଆୟରଲାଣ୍ଡ ଅଧିନାୟକ ଏଣ୍ଡ୍ରୁ ବଲବର୍ଣ୍ଣିଙ୍କ ଚଳିତ ବିଶ୍ବକପରେ ଆଖି ଦୃଶିଆ ପ୍ରଦର୍ଶନ ଦେଖିବାକୁ ମିଳିନାହିଁ । କେବଳ ଗ୍ରୁପ ମ୍ୟାଚରେ ୱେଷ୍ଟ ଇଣ୍ଡିଜ ବିପକ୍ଷରେ ୩୭ ରନର ପାଳିକୁ ଛାଡି ଦେଲେ ଅନ୍ୟ କୌଣସି ମ୍ୟାଚରେ ଏତେଟା ପ୍ରଭାବ ବିସ୍ତାର କରିପାରିନାହଁନ୍ତି । ତଥାପି ଦଳର ଆଖି ଦୃଶିଆ ପ୍ରଦର୍ଶନ ବ୍ୟାଟିଂ, ବୋଲିଂ ଏବଂ ଫିଲ୍ଡିଂ ଉପରେ ନିର୍ଭର କରିବ ।
ସେପଟେ ଶକ୍ତିଶାଳୀ ଇଂଲଣ୍ଡ ପ୍ରଥମ ମ୍ୟାଚରେ ଆଫଗାନିସ୍ତାନକୁ ପରାସ୍ତ କରିଥିଲା । ସାମ କରନଙ୍କ ସର୍ବାଧିକ ୫ ୱିକେଟ ବଳରେ ଇଂଲଣ୍ଡ ସହଜରେ ବିଜୟ ଲାଭ କରିଥିଲା । ଚଳିତ ବିଶ୍ବକପରେ ବିଜୟରୁ ଅଭିଯାନ ଆରମ୍ଭ କରିଥିବା ବଟଲର ବାହିନୀ ଏହି ଧାରା ବଜାୟ ରଖିବାକୁ ଚାହିଁବେ ।