ୱାଶିଂଟନ:ପ୍ରଧାନମନ୍ତ୍ରୀ ମୋଦି ବିଶ୍ବର ସବୁଠୁ ଅଧିକ ଲୋକପ୍ରିୟ ନେତା ଅଟନ୍ତି । ଦେଶ ବିଦେଶରେ ତାଙ୍କର ପ୍ରଶଂସକ ରହିଛନ୍ତି । ବର୍ତ୍ତମାନ ମୋଦି ଆମେରିକା ଗସ୍ତରେ ଥିବାବେଳେ ସେଠାରେ ମଧ୍ୟ ତାଙ୍କର ଅଦ୍ଭୁତପୂର୍ବ ଲୋକପ୍ରିୟତା ଦେଖିବାକୁ ମିଳିଛି । ମୋଦି ମଙ୍ଗଳବାର ନ୍ୟୁୟର୍କରେ ପହଞ୍ଚିବା ପରେ ପ୍ରବାସୀ ଭାରତୀୟମାନେ ହାତରେ ତ୍ରିରଙ୍ଗା ତାଙ୍କୁ ଭବ୍ୟ ସ୍ବାଗତ କରିଥିଲେ । ସେ ରହୁଥିବା ହୋଟେଲ Lotte ବାହାରେ ଭାରତୀୟ ସମୁଦାୟଙ୍କ ପ୍ରବଳ ଭିଡ ଦେଖିବାକୁ ମିଳିଥିଲା । 'ଭାରତ ମାତା କି ଜୟ' ସ୍ଲୋଗାନ ସହିତ ଲୋକେ ତାଙ୍କୁ ଦେଖି ଖୁବ୍ ଉତ୍ସାହିତ ହୋଇଥିଲେ । ସେହି ପ୍ରବାସୀ ଭାରତୀୟଙ୍କ ମଧ୍ୟରେ ଏମିତି ଜଣେ ବ୍ୟକ୍ତି ଥିଲେ, ଯିଏ ପ୍ରଧାନମନ୍ତ୍ରୀ ମୋଦିଙ୍କ ପ୍ରତିଛବି ଥିବା ଏକ ଜ୍ୟାକେଟ ପିନ୍ଧିଥିଲେ । ତାଙ୍କର ଏହି ସ୍ବତନ୍ତ୍ର ଜ୍ୟାକେଟ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା ।
ସମ୍ପୃକ୍ତ ବ୍ୟକ୍ତିଙ୍କ ନାମ ମନୀଷ ସି ପଟେଲ । ସେ ମୋଦିଙ୍କ ପ୍ରତିଛବି ଥିବା ଜ୍ୟାକେଟ ପିନ୍ଧି ତାଙ୍କ ପ୍ରତି ନିଜର ପ୍ରେମ ଓ ସମ୍ମାନ ଦେଖାଇଥିଲେ । ଏନେଇ ମନୀଷ କହିଛନ୍ତି, ''୨୦୧୫ରେ ଗୁଜୁରାଟ ଡେ' ପାଳନ ସମୟରେ ଏହି ଜ୍ୟାକେଟ ପ୍ରସ୍ତୁତ ହୋଇଥିଲା । ଆମ ପାଖରେ ଏଭଳି ୨୬ଟି ଜ୍ୟାକେଟ ଅଛି । ତା' ଭିତରୁ ଆଜି ଏଠାରେ ୪ଟି ଅଛି ।'' ଅନ୍ୟଜଣେ ଭାରତୀୟ ବଂଶୋଦ୍ଭବ ଆମେରିକାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟି ନିଜକୁ ଖୁବ୍ ଭାଗ୍ୟବାନ ମନେ କରୁଥିବା କହିଛନ୍ତି ।