ହାଇଦ୍ରାବାଦ: ସାଇକ୍ଲୋନିକ୍ ଝଡ଼ 'ମିଗଜୋମ' ଘୂର୍ଣ୍ଣିବଳୟର ପ୍ରଭାବ ଚେନ୍ନାଇରେ ଦେଖିବାକୁ ମିଳିଛି । ଫଳରେ ସହରରେ ପ୍ରବଳ ବର୍ଷା ହେବା ଫଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଏହାରି ମଧ୍ୟରେ ସାଧାରଣ ଲୋକଙ୍କ ବ୍ୟତୀତ ଆମୀର ଖାନ ଏବଂ ଅଭିନେତା ବିଷ୍ଣୁ ବିଶାଲ ସହରର କରାପକ୍କମ ଅଂଚଳରେ ଫସି ରହିଥିଲେ । ଅଭିନେତା ବିଷ୍ଣୁ ବିଶାଲ ସୋସିଆଲ ମିଡିଆ ମାଧ୍ୟମରେ ଫସି ରହିଥିବା ସୂଚନା ଦେଇଥିଲେ । ପରେ ଉଭୟଙ୍କୁ ୨୪ ଘଣ୍ଟା ପରେ ଅଗ୍ନିଶମ ଏବଂ ଉଦ୍ଧାରକାରୀ ଟିମ୍ ଉଦ୍ଧାର କରିଛନ୍ତି ।
ଗଣମାଧ୍ୟମ ରିପୋର୍ଟ ଅନୁଯାୟୀ, ସୁପରଷ୍ଟାର କରାପକ୍କମ ସ୍ଥିତ ତାଙ୍କ ଘରେ କୋଲିଉଡ ଅଭିନେତା ବିଷ୍ଣୁ ବିଶାଲଙ୍କ ସହ ରହିଥିଲେ । ସୋସିଆଲ ମିଡିଆରେ ବିଷ୍ଣୁ ବିଶାଲ ଏକ୍ସରେ ଘଟଣାର କିଛି ଫଟୋ ସେୟାର କରିଛନ୍ତି । ଏବଂ ନିଜ ଭଳି ଫସି ରହିଥିବା ଲୋକଙ୍କୁ ସାହାଯ୍ୟ କରିଥିବାରୁ ଅଗ୍ନିଶମ ବିଭାଗକୁ କୃତଜ୍ଞତା ଜଣାଇଛନ୍ତି । ସେୟାର ହୋଇଥିବା ଫଟୋରେ ଆମୀର ଖାନ ସେଲିବ୍ରିଟି ଦମ୍ପତି ବିଷ୍ଣୁ ବିଶାଲ ଏବଂ ଜୱାଲା ଗୁଟ୍ଟାଙ୍କ ସହ ନଜର ଆସିଛନ୍ତି । ତେବେ ସୋସିଆଲ ମିଡିଆରେ ଆମୀର ଖାନ ଏବଂ ବିଷ୍ଣୁ ବିଶାଲଙ୍କ ଉଦ୍ଧାରର ଫଟୋ ଭାଇରାଲ ହେବାରେ ଲାଗିଛି ।
ସେ ଏହି ଉଦ୍ଧାର ସମୟର ଫଟୋ ସେୟାର କରି ଆହୁରି ଲେଖିଛନ୍ତି ଯେ କରାପକ୍କମରେ ୩ଟି ଡଙ୍ଗାରେ ଅଗ୍ନିଶମ ଏବଂ ଉଦ୍ଧାରକାରୀ ଟିମ ପ୍ରଭାବଶାଳୀ ଭାବେ ଉଦ୍ଧାର କାର୍ଯ୍ୟ କରିଛନ୍ତି । ତାମିଲନାଡୁ ସରକାରଙ୍କ ଉଦ୍ୟମକୁ ପ୍ରଶଂସା କରିବା ସହ ନିରନ୍ତର ଭାବରେ କାର୍ଯ୍ୟ କରୁଥିବା ସମସ୍ତ ପ୍ରଶାସନିକ କର୍ମଚାରୀଙ୍କୁ ଧନ୍ୟବାଦ ଜଣାଇଥିଲେ ସୁପରଷ୍ଟାର ଆମୀର ଖାନ୍ ।