ଭୁବନେଶ୍ବର: ଓମ୍ବାଡ୍ସି ପ୍ରକଳ୍ପ ଗୁଡିକରେ ଉଲ୍ଲେଖନୀୟ ସଫଳତା ଏବଂ ଲୋକପ୍ରିୟତା । ୧ମ ପର୍ଯ୍ୟାୟର ଶତପ୍ରତିଶତ ଗୁରୁତ୍ୱପୂର୍ଣ୍ଣ ପ୍ରକଳ୍ପ ପୂର୍ଣ୍ଣାଙ୍ଗ ହୋଇଛି । ୧୭୫୨ କୋଟି ଟଙ୍କାର ୬ ଟି ନୂଆ ପ୍ରକଳ୍ପକୁ ଆଜି ମଞ୍ଜୁର କରାଯାଇଛି । ଅଧିକ ଜୀବିକାନିର୍ବାହ ଓ କୌଶଳ ବିକାଶ ପ୍ରକଳ୍ପ ସାମିଲ କରିବାକୁ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ନିର୍ଦ୍ଦେଶ ଦେଇଛନ୍ତି ।
ଓଡିଶା ଖଣିଜ ଅଞ୍ଚଳ ବିକାଶ (ଓମ୍ବାଡ୍ସି) ପାଣ୍ଠିରେ କାର୍ଯ୍ୟକାରୀ ହେଉଥିବା ପ୍ରକଳ୍ପଗୁଡିକରେ ଉଲ୍ଲେଖନୀୟ ଅଗ୍ରଗତି ହାସଲ ହୋଇଛି । ନିର୍ଦ୍ଧାରିତ ସମୟ ମଧ୍ୟରେ ପ୍ରକଳ୍ପ ଶେଷ ହୋଇ ଲୋକଙ୍କ ଆବଶ୍ୟକତା ପୁରଣ କରୁଥିବାରୁ ଏହି ପ୍ରକଳ୍ପଗୁଡିକ ମଧ୍ୟ ବେଶ୍ ଲୋକପ୍ରିୟ ହୋଇଛି । ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଓମ୍ବାଡ୍ସିର ନିର୍ଦ୍ଦେଶକ ପରିଷଦ ବୈଠକର ଆଲୋଚନାରୁ ଏହା ଜଣାପଡିଛି । ଲୋକସେବା ଭବନରୁ ଭିସି ଜରିଆରେ ଅନୁଷ୍ଠିତ ଏହି ବୈଠକରେ ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଭାରପ୍ରାପ୍ତ ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ ପ୍ରକଳ୍ପଗୁଡିକର କାର୍ଯ୍ୟାନ୍ୱୟନ ସମ୍ବନ୍ଧିତ ବିଷୟ ଆଲୋଚନା ନିମନ୍ତେ ଉପସ୍ଥାପନ କରିଛନ୍ତି ।
ଓମ୍ବାଡ୍ସିର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜି.ରାଜେଶ ପ୍ରକଳ୍ପଗୁଡିକର ସଦ୍ୟତନ ତଥ୍ୟ ସହ ବିଭିନ୍ନ ବିଭାଗରୁ ମିଳିଥିବା ନୂଆ ପ୍ରକଳ୍ପଗୁଡିକ ଉପସ୍ଥାପନ କରିଛନ୍ତି ।ପ୍ରସ୍ତାବିତ ପ୍ରକଳ୍ପଗୁଡିକର ଜନସାଧାରଣଙ୍କ ନିମନ୍ତେ ଆବଶ୍ୟକତା ଏବଂ ପରିବେଶ ଅନୁକୂଳତା ଆଦିକୁ ବିଚାର କରି ସମୁଦାୟ ୬ ଟି ପ୍ରକଳ୍ପକୁ ମୁଖ୍ୟ ଶାସନ ସଚିବ ଅନୁମୋଦନ କରିଛନ୍ତି । ଏହି ସବୁ ପ୍ରକଳ୍ପ ପାଇଁ ପ୍ରାୟ ୧,୭୫୨ କୋଟି ଟଙ୍କାର ବ୍ୟୟ ବରାଦ କରାଯାଇଛି । ଅଧିକ ସଂଖ୍ୟାରେ ଜୀବିକା ନିର୍ବାହ କୌଶଳ ବିକାଶ ଏବଂ ନୂଆ ଆୟ ପନ୍ଥା ସମ୍ବନ୍ଧିତ ପ୍ରକଳ୍ପ ସୁପାରିଶ କରିବା ପାଇଁ ମୁଖ୍ୟ ଶାସନ ସଚିବ ବିଭିନ୍ନ ବିଭାଗମାନଙ୍କୁ ନିର୍ଦ୍ଦେଶ ଦେଇଛନ୍ତି । କୌଶଳ ବିକାଶ ବିଭାଗ ସହଭାଗିତାରେ ଖଣି କାର୍ଯ୍ୟ ପ୍ରଭାବିତ ଅଂଚଳର ଯୁବକ ଯୁବତୀମାନଙ୍କ ନିମନ୍ତେ ବିଭିନ୍ନ ପ୍ରକାର କୌଶଳ ବିକାଶ ପ୍ରକଳ୍ପ ଆରମ୍ଭ କରିବା ପାଇଁ ମଧ୍ୟ ମୁଖ୍ୟ ଶାସନ ସଚିବ ନିଗମକୁ ନିର୍ଦ୍ଦେଶ ଦେଇଛନ୍ତି ବୈଠକରେ ଅନୁମୋଦିତ ହୋଇଥିବା ପ୍ରକଳ୍ପଗୁଡିକ ମଧ୍ୟରେ ମୁଖ୍ୟତଃ କେନ୍ଦୁଝର, ମୟୁରଭଞ୍ଜ ଓ ସୁନ୍ଦରଗଡ଼ ଜିଲ୍ଲାର ୩୬ ଟି ବ୍ଲକ୍ ପାଇଁ ପ୍ରାକୃତିକ କୃଷି ପ୍ରକଳ୍ପ ରହିଛି ।
ଏହି ପ୍ରକଳ୍ପ ମାଧ୍ୟମରେ କୃଷି କ୍ଷେତ୍ରରେ ବର୍ଷ ସାରା ଫସଲ ଉତ୍ପାଦନ ହେବ । କୃଷକ ତାହା ପର୍ଯ୍ୟାୟକ୍ରମେ ଅମଳ କରିବେ । ଏଥିରେ ପ୍ରାୟ ୨୫୦.୭୨ କୋଟି ଟଙ୍କା ବିନିଯୋଗ ହେବ । ୨.୪୯ ଲକ୍ଷ କୃଷକ ପରିବାର ଉପକୃତ ହେବେ । ଦ୍ୱିତୀୟ ଅନୁମୋଦିତ ପ୍ରକଳ୍ପ ହେଲା ମୟୁରଭଞ୍ଜ ଜିଲ୍ଲା ଅନ୍ତର୍ଗତ ୭୮୭ ଟି ଗ୍ରାମ ପାଇଁ ପ୍ରାୟ ୮୫୬.୮୭ କୋଟି ଟଙ୍କା ବିନିଯୋଗରେ ପାନୀୟ ଜଳଯୋଗାଣ ପ୍ରକଳ୍ପ ।ଅନ୍ୟ ଅନୁମୋଦିତ ପ୍ରକଳ୍ପଗୁଡିକ ହେଲା ମୟୁରଭଞ୍ଜ ଓ କେନ୍ଦୁଝରରେ ସମନ୍ୱିତ ପୁନଃଥଇଥାନ କେନ୍ଦ୍ର ପ୍ରତିଷ୍ଠା ହେବ । ଯାହାର ୧୦୬.୩୬ କୋଟି ଆକଳନ ମୂଲ୍ୟ ରହିଛି । କେନ୍ଦୁଝର ଜିଲ୍ଲାର ୨୩ ଟି ଗ୍ରାମ ପାଇଁ ସବୁଦିନିଆ ରାସ୍ତା ସଂଯୋଗ ଲାଗି ୧୯.୬୪ କୋଟି ଆକଳନ ମୂଲ୍ୟ ରହିଛି । ମୟୁରଭଞ୍ଜ ସ୍ଥିତ ମହାରାଜା ଶ୍ରୀରାମ ଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟରେ ଭିତ୍ତିଭୂମି ଉନ୍ନୟନ ଲାଗି ୨୯ କୋଟି ଆକଳନ କରାଯାଇଛି । ଏବଂ ଓଡ଼ିଶା ଆଦର୍ଶ ବିଦ୍ୟାଳୟରେ ଗୁଣାତ୍ମକ ଶିକ୍ଷାର ବିକାଶ ଲାଗି ୪୮୯.୫୩ କୋଟି ଆକଳନ ମୂଲ୍ୟ ରହିଛି ।
ମୁଖ୍ୟ କାର୍ଯ୍ୟନିର୍ବାହୀ ଜି ରାଜେଶ ଜଣାଇଛନ୍ତି ଯେ, ଓମ୍ବାଡ୍ସିକୁ ପ୍ରଥମ ପର୍ଯ୍ୟାୟରେ ଆଡହକ୍ କାମ୍ପା ବାବଦରେ ୮୬୯.୪୨ କୋଟି ଟଙ୍କା ମିଳିଥିଲା । ସେଥିରୁ ୪୦୨.୦୩ କୋଟି ଟଙ୍କା ବିନିଯୋଗରେ ୨୯୮୨୯ ପରିବାର ପାଇଁ ପକ୍କା ଘର ନିର୍ମାଣ, ୬୧୮.୫୯ କୋଟି ବିନିଯୋଗରେ ୨୧୫ ଟି ପାଇପ ଜଳ ଯୋଗାଣ, ୫୬.୦୬ କୋଟି ଟଙ୍କା ବିନିଯୋଗରେ ବନାୟନ, ମୁର୍ତ୍ତିକା ଓ ଆର୍ଦ୍ରତା ସଂରକ୍ଷଣ, ୨.୦୪ କୋଟି ଟଙ୍କା ବିନିଯୋଗରେ ଖଣି କାର୍ଯ୍ୟ ପ୍ରଭାବିତ ୬୯୧ ଟି ଗ୍ରାମର ଆଦିବାସୀ ଯୁବବର୍ଗ ପାଇଁ କୌଶଳ ବିକାଶ ଆଦି ପ୍ରକଳ୍ପ କରାଯାଇଛି । ବର୍ତ୍ତମାନ ସୁଦ୍ଧା ସମସ୍ତ ପାଇପ୍ ଜଳ ଯୋଗାଣ, ପକ୍କାଘର ନିର୍ମାଣ ଏବଂ ବନାୟନ ପ୍ରକଳ୍ପ ଶତ ପ୍ରତିଶତ ପୂର୍ଣ୍ଣାଙ୍ଗ ହୋଇଛି । କୌଶଳ ବିକାଶ ପ୍ରକଳ୍ପରେ ୮୦ ପ୍ରତିଶତରୁ ଉର୍ଦ୍ଧ୍ୱ ସଫଳତା ହାସଲ ହୋଇଛି ।
ସେହିପରି ୨ୟ ପର୍ଯ୍ୟାୟରେ କ୍ଷତିପୂରକ ପାଣ୍ଠି ଭାବେ ସୁଧ ସହ ମିଶାଇ ଓମ୍ବାଡ୍ସି ପାଇଁ ୧୯,୮୨୩ କୋଟି ଟଙ୍କାର ପାଣ୍ଠି ସୃଷ୍ଟି ହୋଇଛି । ସେଥିରୁ ୧୬ ଟି ବିଭାଗ ମାଧ୍ୟମରେ ଆସିଥିବା ପ୍ରାୟ ୧୫,୮୭୧ କୋଟି ଟଙ୍କା ମୂଲ୍ୟର ୪୭ ଟି ପ୍ରକଳ୍ପ ପୂର୍ବରୁ ମଂଜୁର କରାଯାଇଛି । କ୍ଷେତ୍ରସ୍ତରରେ ଏହିସବୁ ପ୍ରକଳ୍ପ ତ୍ୱରାନ୍ୱିତ ଗତିରେ କାର୍ଯ୍ୟାନ୍ୱୟନ କରାଯାଉଛି । ଏହି ସବୁ ପ୍ରକଳ୍ପ ମୁଖ୍ୟତଃ ପାନୀୟ ଜଳ ଯୋଗାଣ, ଶିକ୍ଷା, ସ୍ୱାସ୍ଥ୍ୟ, ଜୀବିକା ବୃଦ୍ଧି, ପରିବେଶ ବିକାଶ, ଗ୍ରାମୀଣ ରାସ୍ତା ସଂଯୋଗୀକରଣ ଏବଂ ଜଳ ସଂରକ୍ଷଣ ବିଷୟ ଅନ୍ତର୍ଗତ । ଆଜିର ବୈଠକରେ ନୂଆ ୬ ଟି ପ୍ରକଳ୍ପ ପାଇଁ ବର୍ତ୍ତମାନ ୧,୭୫୨ କୋଟି ଟଙ୍କାର ମଂଜୁର କରାଯାଇଛି ।ଉନ୍ନୟନ କମିଶନର ପ୍ରଦୀପ କୁମାର ଜେନା, ଖଣି ଓ ଇସ୍ପାତ ପ୍ରମୁଖ ଶାସନ ସଚିବ ଦେଓ ରଂଜନ କୁମାର ସିଂ, ପଂଚାୟତିରାଜ ଓ ପାନୀୟ ଜଳ ପ୍ରମୁଖ ଶାସନ ସଚିବ ଅଶୋକ କୁମାର ମୀନା, ଅର୍ଥ ବିଭାଗ ପ୍ରମୁଖ ଶାସନ ସଚିବ ବିଶାଳ କୁମାର ଦେବ, ପ୍ରଧାନ ମୁଖ୍ୟ ବନ ସଂରକ୍ଷକ ଦେବିଦତ୍ତ ବିଶ୍ୱାଳଙ୍କ ସମେତ ଭାରତ ସରକାର ଏବଂ ଓଡ଼ିଶା ସରକାରଙ୍କ ବିଭିନ୍ନ ବିଭାଗର ବରିଷ୍ଠ ଅଧିକାରୀ ଓ ବୋର୍ଡର ନିର୍ଦ୍ଦେଶକମାନେ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
