ନୂଆଦିଲ୍ଲୀ: ଭାରତ ପାଇଁ ଐତିହାସିକ ଦିନ ହେବାକୁ ଯାଉଛି ଜୁନ 21 ତାରିଖ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଥମ ଥର ପାଇଁ ଜାତିସଂଘ ମୁଖ୍ୟାଳୟରେ ଅନ୍ତର୍ଜାତୀୟ ଯୋଗ ଦିବସର ନେତୃତ୍ବ ନେବାକୁ ଯାଉଛନ୍ତି । ଜାତିସଂଘ 2014ରେ ଜୁନ 21 ତାରିଖରୁ ଅନ୍ତର୍ଜାତୀୟ ଯୋଗ ଦିବସ ଭାବେ ଘୋଷଣା କରିଥିଲା । ଚଳିତ ବର୍ଷ ଏହା ନବମ ଅନ୍ତର୍ଜାତୀୟ ଯୋଗ ଦିବସ । ଦିବସର ମୁଖ୍ୟ ଉଦ୍ଦେଶ୍ୟ ହେଉଛି ବିଶ୍ବସ୍ତରରେ ଯୋଗକୁ ନେଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା । ଜାତିସଂଘ ମୁଖ୍ୟାଳୟରେ ପ୍ରଥମ ଥର ପାଇଁ ଯୋଗ ଅଧିବେଶନର ନେତୃତ୍ବ ନେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ଅନ୍ତର୍ଜାତୀୟ ଯୋଗ ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତ ପକ୍ଷରୁ ପ୍ରତିନିଧିତ୍ବ କରିବେ । ଅନ୍ତର୍ଜାତୀୟ ଯୋଗ ଦିବସରେ ଜାତିସଂଘ ମହାସଭା ମଞ୍ଚରେ ପ୍ରଥମ ଥର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ବୋଧିତ କରିବେ । 21 ଜୁନ ସକାଳ 8ଟାରୁ9ଟା ଯାଏ ଜାତିସଂଘ ମୁଖ୍ୟାଳୟ ଉତ୍ତର ଲନରେ ଯୋଗ ଅଧିବେଶନ ହେବ । ଏହି ଠାରେ ଗତବର୍ଷ ଡିସେମ୍ବରରେ ଜାତିର ଜନକ ମାହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ସ୍ଥାପନା ହୋଇଥିଲା । ଐତିହାସିକ ଯୋଗ ଅଧିବେଶନରେ ଜାତିସଂଘର ଶୀର୍ଷ ଅଧିକାରୀ, ରାଷ୍ଟ୍ରଦୂତ, ସଦସ୍ୟ ଦେଶ ପ୍ରତିନିଧିଙ୍କ ସହିତ ପ୍ରବାସୀ ସମୁଦାୟର ପ୍ରମୁଖ ସଦସ୍ୟ ଅଂଶଗ୍ରହଣ କରିବେ ।
ଜାତିସଂଘ ମହାସଭାର 77ତମ ଅଧିବେଶନ ଅଧ୍ୟକ୍ଷ ସାବା କୋରୋସି ଟ୍ବିଟ କରି କହିଛନ୍ତି, "ଆସନ୍ତା ସପ୍ତାହରେ UNHQ ଉତ୍ତର ଲନରେ ପ୍ରଧାନମନ୍ତ୍ରୀ ମୋଦିଙ୍କ ସହ ସଂଯୁକ୍ତ ରାଷ୍ଟ୍ର ନବମ ଅନ୍ତର୍ଜାତୀୟ ଯୋଗ ଦିବସରେ ଭାଗ ନେବା ନେଇ ମୁଁ ଉତ୍ସାହିତ ।" ପ୍ରଧାନମନ୍ତ୍ରୀଙ୍କ ସହ ଏକ ଫଟୋ ମଧ୍ୟରେ ନିଜ ଟ୍ବିଟରରେ ସେୟାର କରିଛନ୍ତି ସାବା କୋରୋସି ।