ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭାରେ ଚାଲିଛି ମୌସୁମୀ ଅଧିବେଶନ । ଅଧିବେଶନ ଚାଲିଥିବା ବେଳେ ବିଧାନସଭା ମଧ୍ୟରେ ମହୋବା ଜିଲ୍ଲାର ସଦର ବିଧାୟକ ମୋବାଇଲରେ ଗେମ (MLA seen playing Teen Patti ) ଖେଳୁଥିବା ନଜର ଆସିଛନ୍ତି । ଏହି ଭିଡ଼ିଓ ଭାଇରାଲ ହେବା ପରେ ବିରୋଧୀ ତାଙ୍କୁ ଟାର୍ଗେଟ କରିଛନ୍ତି । ସପା (Samajwadi Party)ର ମୁଖ୍ୟ ଅଖିଳେଶ ଯାଦବ (Akhilesh Yadav ) ନିଜ ସୋସିଆଲ ମିଡ଼ିଆରେ ଏହି ଭାଇରାଲ ଭିଡ଼ିଓ ସେୟାର କରି ବିଧାୟକଙ୍କୁ କଟାକ୍ଷ କରିବା ସହ ସରକାରଙ୍କୁ ଟାର୍ଗେଟ କରିଛନ୍ତି ।
ସପାର କହିବା ଅନୁସାରେ ଯେଉଁଠାରେ ଦରବୃଦ୍ଧି, ବେରୋଜଗାର ଓ ବିକାଶର ସମ୍ପର୍କରେ ଆଲୋଚନା କରାଯିବା କଥା, ସେଠାରେ ସଦର ବିଧାୟକ ରାକେଶ ଗୋସ୍ବାମୀ ମୋବାଇଲରେ ଗେମ ଖେଳିବା ଦ୍ବାରା ଗୃହର ସମ୍ମାନ କ୍ଷୁର୍ଣ୍ଣ ହୋଇଛି । ବିଧାୟକଙ୍କ ଏହି କାର୍ଯ୍ୟ ଦ୍ବାରା ସ୍ଥାନୀୟ ଲୋକେ ମଧ୍ୟ ତାଙ୍କୁ ନେଇ କ୍ଷୋଭ ପ୍ରକାଶ କରିବା ସହ ସୋସିଆଲ ମିଡ଼ିଆରେ ଭିନ୍ନ ଭିନ୍ନ ପ୍ରତିକ୍ରିୟା ପ୍ରକାଶ କରିଛନ୍ତି । ଯେଉଁଠି ଲୋକଙ୍କ ସମସ୍ୟା ମୁଦ୍ଦା ଉଠାଯାଇ ଏହାର ସମାଧାନ କରାଯିବା କଥା ସେହି ସ୍ଥାନକୁ ବିଧାୟକ ଏକ ମନୋରଞ୍ଜନ ସ୍ଥାନ ବୋଲି ଭାବିଥିବା ସପା ଅଭିଯୋଗ କରିଛି ।