ଗୌହାଟୀ: ଦୀପାବଳିରେ ସରକାରୀ କର୍ମଚାରୀଙ୍କୁ ବଡ ଉପହାର ଦେଇଛନ୍ତି ଆସାମ ସରକାର । ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା (DA)କୁ ୪ ପ୍ରତିଶତ ବୃଦ୍ଧି କରିଛନ୍ତି ଆସାମ ସରକାର (Assam hikes DA for government employees) । ଆଜି (ରବିବାର) ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଏହି ପ୍ରସ୍ତାବକୁ ଅନୁମୋଦନ କରିଛନ୍ତି । ପୂର୍ବରୁ ଆସାମର ସରକାରୀ କର୍ମଚାରୀମାନେ ୩୪ ପ୍ରତିଶତ ମହଙ୍ଗା ଭତ୍ତା ପାଉଥିବା ବେଳେ ଚଳିତଥର ଏହି ରାଶି 38 ପ୍ରତିଶତକୁ ବୃଦ୍ଧି ପାଇବ । ଏହି ବର୍ଦ୍ଧିତ ରାଶି ଚଳିତବର୍ଷ ଜୁଲାଇରୁ ପିଛିଲା ଭାବେ କାର୍ଯ୍ୟକରୀ ହେବା ନେଇ ସରକାର ସ୍ପଷ୍ଟ କରିଛନ୍ତି ।
ଏହି ନିଷ୍ପତ୍ତି ସମ୍ପର୍କରେ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଟ୍ୱିଟରେ କହିଛନ୍ତି, "ଦୀପାବଳୀ ଅବସରରେ ସେ ଏହି ଘୋଷଣା କରି ବେଶ ଖୁସି । ଏହି ନିଷ୍ପତ୍ତି କର୍ମଚାରୀଙ୍କ ପାଇଁ ଦୀପାବଳି ଭେଟି । ରାଜ୍ୟ ସରକାରଙ୍କ କର୍ମଚାରୀଙ୍କ ସମେତ ଆସାମରେ କାର୍ଯ୍ୟରତ ସର୍ବଭାରତୀୟ ଅଧିକାରୀମାନେ ମଧ୍ୟ ଏହି ନିଷ୍ପତ୍ତିର ସୁଫଳ ପାଇବେ । ଏହି ନିଷ୍ପତି ଜୁଲାଇ ପହିଲାରୁ ପିଚ୍ଛିଲା ଭାବେ ଲାଗୁ ହେବାକୁ ଯାଉଛି ।’’