ଲକ୍ଷ୍ନୌ:ବାରାଣାସୀରେ ବାଉନସର ମୁତୟନ କରି ପରିବା ବିକ୍ରି କରି ଚର୍ଚ୍ଚାକୁ ଆସିଥିଲେ ବ୍ୟବସାୟୀ । ସୋସିଆଲ ମିଡିଆରୁ ମୁଖ୍ୟସ୍ରୋତ ଗଣମାଧ୍ୟମ ପର୍ଯ୍ୟନ୍ତ ସବୁଠି ଏହି ଖବର ଚର୍ଚ୍ଚାରେ ଥିଲା । ଦୋକାନ ସମ୍ମୁଖରେ ଦୁଇଜଣ ବାଉନସରଙ୍କୁ ଛିଡା କରାଇ ପରିବା ବିକ୍ରି କରିଥିଲେ ସମ୍ପୃକ୍ତ ବ୍ୟବସାୟୀ । ହେଲେ ସାମାଜବାଦୀ ପାର୍ଟିର ଜଣେ ସ୍ଥାନୀୟ ନେତାଙ୍କ ପ୍ରରୋଚନାରେ ଏପରି କରାଯାଇଥିବା ଜଣାପଡିବା ପରେ ପୋଲିସ ଏବେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଦୁଇ ଜଣଙ୍କୁ ଗିରଫ କରାଯାଇଛି । ସମ୍ପୃକ୍ତ ସ୍ଥାନୀୟ ରାଜନେତାଜଣଙ୍କ ଏବେ ଫେରାର ରହିଛନ୍ତି । ତାଙ୍କୁ ଗିରଫ କରିବା ପାଇଁ ପ୍ରୟାସ ଜାରି ରହିଥିବା ପୋଲିସ କହିଛି । ସେ ବାଉନସର ଛିଡା କରାଇ ପରିବା ବିକ୍ରି କରାଇବା ସହ ବିଜେପି ସରକାରର 9 ବର୍ଷ ଶାସନରେ ଦରଦାମ ବୃଦ୍ଧି ନେଇ କଟାକ୍ଷମୂଳକ ପୋଷ୍ଟର ଓ ପ୍ଲାକକାର୍ଡ ମଧ୍ୟ ଲଗାଇଥିଲେ ।
ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ, ବାରାଣାସୀର ସ୍ଥାନୀୟ ବଜାରରେ ରାଜନାରାୟଣ ନାମକ ଜଣେ ବ୍ୟବସାୟୀ ଏବଂ ତାଙ୍କ ପୁଅ ବିକାଶ ପରିବା ଦୋକାନ କରିଛନ୍ତି । ଉକ୍ତ ଦିନ ସ୍ଥାନୀୟ ଜଣେ ସାମାଜବାଦୀ ପାର୍ଟିର ନେତା ଅଜୟ ଯାଦବ ଏହି ଦୋକାନରେ ଦୁଇଜଣ ବାଉନସର ନିୟୋଜିତ କରିଥିଲେ । ଏହା ପରେ ଅଜୟ ନିଜେ ଉପସ୍ଥିତ ରହି ଟମାଟୋ ବିକ୍ରି କରିଥିଲେ । ଘଟଣା ସମ୍ପର୍କରେ ଗଣମାଧ୍ୟମରେ ଖବର ପ୍ରସାରିତ ହେବା ପରେ ସ୍ଥାନୀୟ ପ୍ରଶାସନିକ ଅଧିକାରୀ ଘଟଣାସ୍ଥଳର ପହଞ୍ଚିଥିଲେ । ମୋଟ 3 ଜଣଙ୍କ ନାମରେ ମାମଲା ରୁଜୁ ହୋଇଥିଲା । ପୋଲିସ ବ୍ୟବସାୟୀ ବାପ-ପୁଅଙ୍କୁ ଗିରଫ କରିଥିବା ବେଳେ ଏପରି ଯୋଜନା କରିଥିବା ସମାଜବାଦୀ ପାର୍ଟି ନେତା ଅଜୟ ଯାଦବ ଏବେ ଫେରାର ରହିଛନ୍ତି ।
ଏହା ମଧ୍ୟ ପଢନ୍ତୁ:-ଚର୍ଚ୍ଚାରେ ପରିବା ଦୋକନୀ, ଟମାଟୋ ପାଇଁ ଆଣିଲେ ବାଉନସର