ଶ୍ରୀନଗର:ଜମ୍ମୁ-କାଶ୍ମୀର ଅନନ୍ତନାଗ ଏନକାଉଣ୍ଟରେ ଆଉ ଜଣେ ଯବାନ ଶହୀଦ ହୋଇଯାଇଛନ୍ତି । ଆଜି(ଶୁକ୍ରବାର) ସକାଳେ ଜଣେ ଆହତ ଯବାନଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି । ଯାହାଫଳରେ ଶଦୀହଙ୍କ ସଂଖ୍ୟା ୪କୁ ବୃଦ୍ଧି ପାଇଛି । ଏହାପୂର୍ବରୁ ଆତଙ୍କବାଦୀଙ୍କ ସହ ଗୁଳି ବିନିମୟ ବେଳେ ଗତ ବୁଧବାର ଦିନ ଦୁଇ ଜଣେ ସେନା ଅଧିକାରୀଙ୍କ ସମେତ ଜଣେ ଡିଏସପି ଶହୀଦ ହୋଇଯାଇଥିଲେ । ଗୁଳିମାଡରେ ଦୁଇ ଜଣ ଯବାନ ଆହତ ହୋଇଥିଲେ । ସେମାନଙ୍କ ମଧ୍ୟରୁ ଆଜି ଜଣେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଛନ୍ତି ।
ଗତ ବୁଧବାର ଠାରୁ ଅନନ୍ତନାଗର କୋକେରନାଗ ଅଞ୍ଚଳରେ ସୁରକ୍ଷାବାହିନୀ ଓ ଆତଙ୍କୀଙ୍କ ମଧ୍ୟରେ ଗୁଳି ବିନିମୟ ଜାରି ରହିଛି । ଗତ ବୁଧବାର ଦିନ ଏହି ଗୁଳି ବିନିୟମରେ ସେନାର ରାଷ୍ଟ୍ରୀୟ ରାଇଫଲ ୟୁନିଟିର କମାଣ୍ଡିଂ ଅଫିସର କର୍ଣ୍ଣେଲ ମନପ୍ରୀତି ସିଂହ, ମେଜର ଆଶିଷ ଓ ଜମ୍ମୁ କାଶ୍ମୀର ପୋଲିସ ଡିଏସପି ହୁମାୟୁନ ଭଟଙ୍କ ମୃତ୍ୟୁ ହୋଇଥିଲା । ଏଥିରେ ଦୁଇ ଜଣ ଯବାନ ଆହତ ହୋଇଥିଲେ । ଏହାପରଠୁ ସ୍ଥାନୀୟ ଅଞ୍ଚଳରେ ସେନା ପକ୍ଷରୁ ଅପେରସନ ଜୋରଦାର କରାଯାଉଛି । ସର୍ଚ୍ଚ ଅପରେସନରେ ସହାୟତା ପାଇଁ ଏବେ ହେରନ ଡ୍ରୋନ ଓ କ୍ବାଡକାପ୍ଟର ମୁତୟନ କରାଯାଇଛି ।
ସୁରକ୍ଷାବଳ ଓ ଆତଙ୍କୀ ମଧ୍ୟରେ ଘମାଘୋଟ ଲଢେଇ ଜାରି ରହିଛି । ଇତିମଧ୍ୟରେ ଆଜି ଆଉ ଜଣେ ବୀର ଯବାନଙ୍କ ମୃତ୍ୟୁ ପରେ ୩ ଦିନରେ ଶହୀଦଙ୍କ ୪ରେ ପହଞ୍ଚିଛି । ତେବେ ଆଜି ଶହୀଦ ହୋଇଥିବା ଯବାନଙ୍କ ସମ୍ପର୍କରେ କୌଣସି ସୂଚନା ସାର୍ବଜନୀନ କରାଯାଇ ନାହିଁ ।