ଭୁବନେଶ୍ବର: ଆଜି ଦେଶବ୍ୟାପୀ ପାଳିତ ହେଉଛି ଅଗ୍ନିଶମ ସୁରକ୍ଷା ସପ୍ତାହ ଓ ସହୀଦ ଦିବସ । ଚଳିତ ବର୍ଷର ଥିମ୍ ରହିଛି 'ଆଗ୍ନେୟ ସୁରକ୍ଷା ସୁନିଶ୍ଚିତ କରିବା, ରାଷ୍ଟ୍ର ନିର୍ମାଣରେ ଯୋଗଦାନ କରିବା' । ଏନେଇ ବରମୁଣ୍ଡା ଅଗ୍ନିଶମ ପଡିଆରେ ପ୍ରଦର୍ଶିତ ହୋଇଛି ଅଗ୍ନିଶମ ବିଭାଗର ରଣକୌଶଳ । ଏହି କାର୍ଯ୍ୟକ୍ରମରେ ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀଙ୍କ ସମେତ ବହୁ ବରିଷ୍ଠ ଅଧିକାରୀ ଯୋଗ ଦେଇଥିଲେ ।
ପ୍ରତିବର୍ଷ ୧୪ ଏପ୍ରିଲକୁ ଅଗ୍ନିଶମ ସୁରକ୍ଷା ଓ ସହୀଦ ଦିବସ ଭାବେ ପାଳନ କରାଯାଏ । ୧୯୪୪ ମସିହାରେ ମୁମ୍ବାଇର ଭିକ୍ଟୋରିଆ ବନ୍ଦରରେ ଭୟାବହ ଅଗ୍ନିକାଣ୍ଡ ଯୋଗୁଁ ୨୩୯ ଜଣଙ୍କ ସହ ୬୬ ଜଣ ଅଗ୍ନିଶମ କର୍ମଚାରୀଙ୍କ ଜୀବନ ଯାଇଥିଲା । ଏହି ଦୁର୍ଘଟଣାରେ ୪୦୬ ଜଣ ଆହାତ ହୋଇଥିଲେ । ସେହିଦିନଠାରୁ ଆଜିର ଦିନକୁ ଅଗ୍ନିଶମ ବିଭାଗ ପକ୍ଷରୁ ସହୀଦ ଦିବସ ଭାବେ ପାଳନ କରାଯାଏ । ଚଳିତ ବର୍ଷ ଥିମ୍ ରହିଛି 'ଆଗ୍ନେୟ ସୁରକ୍ଷା ସୁନିଶ୍ଚିତ କରିବା, ରାଷ୍ଟ୍ର ନିର୍ମାଣରେ ଯୋଗଦାନ କରିବା' । ଏହି ଅବସରରେ ଭୁବନେଶ୍ବର ବରମୁଣ୍ଡା ପଡିଆରେ ଆୟୋଜିତ ହୋଇଥିଲା ସମାରୋହ । ଯେଉଁଠି ଅଗ୍ନିଶମ ଡିଜିଙ୍କ ସହ ବହୁ ବରିଷ୍ଠ ପଦାଧିକାରୀ ଯୋଗ ଦେଇଥିଲେ ।
ବିପର୍ଯ୍ୟୟ ପରିଚାଳନା ଆଇନ୍ ୨୦୦୫ରେ ରାଜ୍ୟ ସରକାର ଆପତକାଳୀନ ସେବା ଭାବେ ଓଡ଼ିଶା ଅଗ୍ନିଶମକୁ ଘୋଷିତ କରିଛନ୍ତି । ପ୍ରାକୃତିକ ବିପର୍ଯ୍ୟୟରେ ପ୍ରଥମ ସେବା ଯୋଗାଇବା ପାଇଁ ଅଗ୍ନିଶମ ବିଭାଗର ଦାୟିତ୍ବ ରହିଛି । ନିକଟରେ ବାହାନଗା ଟ୍ରେନ ଦୁର୍ଘଟଣାରେ ସେବା ଯୋଗାଇ ସାରା ଦେଶରେ ଉଚ୍ଚ ପ୍ରଶଂସିତ ହୋଇଛି ଓଡ଼ିଶା ଅଗ୍ନିଶମ ବିଭାଗ । ପ୍ରଗତି ସାଥିରେ ଅଗ୍ନିଶମ ବିଭଗର ଦାୟିତ୍ବ ଓ ଗୁରୁତ୍ବ ବଢୁଛି । ସାରା ଦେଶରେ ଓଡ଼ିଶା ଅଗ୍ନିଶମ ବିଭାଗ ଅନେକ କ୍ଷାତି ଅର୍ଜନ କରିଛି । ବାଲେଶ୍ବର ବାହାନଗା ଦୁର୍ଘଟଣାରେ ସେବା ଯୋଗାଇ 'ବେଷ୍ଟ ଆସିଷ୍ଟାଣ୍ଟ ଫାୟାର ଅଫିସର' ଭାବେ ପୂର୍ଣ୍ଣଚନ୍ଦ୍ର ମାର୍ଣ୍ଡିଙ୍କୁ ପୁରସ୍କୃତ କରାଯାଇଛି । ସେହିପରି ଉଲ୍ଲେଖନୀୟ ସେବା ପାଇଁ ଶ୍ରେଷ୍ଠ କେନ୍ଦ୍ର ଅଧିକାରୀ ରୋହିତ କୁମାର ବେହେରାଙ୍କ ସହ ଶ୍ରେଷ୍ଠ ଆଗ୍ନିକ ଭାବେ ଶିବରାମ ଶାନ୍ତି ପୁରସ୍କୃତ ହୋଇଛନ୍ତି । ଉତ୍କୃଷ୍ଟ ସେବା ପାଇଁ ଶ୍ରେଷ୍ଠ ଗାଡି ଚାଳକ ଭାବେ ଝୁମ୍ପୁରା ଗାଡି ଚାଳକ ସୁରେନ୍ଦ୍ର ନାଥ ଟୁଡୁଙ୍କୁ ସମ୍ମାନିତ କରାଯାଇଛି । ସେହିପରି ଅଗ୍ନି ନିର୍ବାପନରେ ଉତ୍କର୍ଷ ସେବା ପାଇଁ ରଞ୍ଜନ କୁମାର ଭୋଇ, ରେଙ୍ଗାଲି ବୋରୱେଲ୍ରୁ ନବଜାତକ ଶିଶୁକୁ ଉଦ୍ଧାର କ୍ଷେତ୍ରରେ ପ୍ରଭାତ କୁମାର ସାହୁଙ୍କୁ ଉତ୍କର୍ଷ ସେବା ପାଇଁ ସମ୍ମାନିତ କରାଯାଇଛି ।