सातारा Satara News : गेल्या महिनाभरापासून गतीनं सुरू असलेलं साताऱ्यातील मेडिकल कॉलेजचं बांधकाम (Medical College Construction) मंगळवारी (19 मार्च) अचानक बंद पाडण्यात आलं. तसंच ठेकेदारासह कर्मचाऱ्यांनी बांधकाम स्थळावरून पलायन केलं आहे. यासंदर्भात दिवसभरात कोणीही तक्रार न दिल्यानं प्रशासनही मूग गिळून गप्प आहे. या घटनेची सध्या साताऱ्यात उलटसुलट चर्चा आहे.
काम बंद ठेवायला कार्यकर्त्यांनी भाग पाडले? : साताऱ्यातील कृष्णानगरमध्ये मेडिकल कॉलेजचे बांधकाम सुरू आहे. मागील काही महिन्यांपासून या कॉलेजचं बांधकाम गतीनं सुरु असताना आज सकाळी अचानक काम बंद झालं. साताऱ्यातील नेत्याच्या कृष्णानगरमधील स्थानिक समर्थकांनी काम बंद ठेवण्यासाठी कर्मचाऱ्यांना धमकावलं असल्याची चर्चा आहे. यामुळं साताऱ्यात एकच खळबळ उडाली आहे.