सातारा - जावळी तालुक्यातील एका 10 वर्षांच्या मुलीचे लैंगिक शोषण केल्याप्रकरणी 65 वर्षांच्या नराधमाला पोलिसांनी अटक केली आहे. हे प्रकरण 25 हजार रुपये देऊन गावातच दाबण्याचा प्रयत्न करणाऱ्या ५ जणांना मेढा पोलिसांनी सहआरोपी करत अटक केली आहे.
सातारा : अल्पवयीन मुलीवरील अत्याचार प्रकरण 25 हजारात मिटवण्याचा प्रयत्न; 5 जणांना अटक 25 हजारांची पीडित कुटुंबीयांना दाखवली आमिष -
गणेश ज्ञानेश्वर पवार, प्रमोद कृष्णा कांबळे, केशव तुकाराम महामुलकर, अशोक ऊर्फ आनंदा निवृत्ती महामुलकर, दिलीप दिनकर महामुलकर अशी मध्यस्ती करु पाहणाऱ्या संशयितांची नावे आहेत. त्यांच्यावर अतिसंवेदनशील गुन्ह्याची तक्रार दाखल न करण्यासाठी 25 हजार रुपयांचे आमिष दाखवून पीडित कुटुंबीयांना धमकावून प्रकरण मिटून घेण्यास सांगितल्याचा आरोप पोलिसांनी ठेवला आहे. बालिका अत्याचार प्रकरणी संशयित बबन उर्फ बबलिंग जगन्नाथ सपकाळ (वय 65) याला यापुर्वीच अटक करण्यात आली आहे. यात आणखी पाच जणांचा समावेश झाला आहे, अशी माहिती पोलिसांनी दिली आहे.
धमकावत प्रकरण दाबण्याचा प्रयत्न -
पोलिसांनी दिलेल्या माहितीनुसार, इयत्ता चौथीत शिकणारी, 10 वर्षांची पिडीत मुलगी मैत्रिणीबरोबर खेळत होती. त्यावेळी तिला हाताला धरून एका छप्परात नेऊन लैंगिक अत्याचार केला. अत्याचारानंतर मुलीला नाव सांगितले तर जीवे मारण्याची धमकी देखील दिली. यासंदर्भात मेढा पोलिसांनी गुन्हा दाखल करुन बबन सपकाळला अटकही केली आहे. त्यापुर्वी पोलिसांत तक्रार होऊ नये म्हणून त्याने गावातील ४-५ लोकांना मध्यस्ती करायला लावून पीडितेच्या कुटुंबीयांवर दबाव टाकत गावातील प्रकरण गावातच मिटवण्याचा प्रयत्न केला. त्यासाठी पीडितेच्या कुटुंबियांना 25 हजार रुपये देण्याचे अमिष दाखवले होते.
यापुर्वी केला होता विनयभंग -
यापुर्वी एप्रिल २०२१ मध्ये बबन सपकाळने याच मुलीचा विनयभंग केला होता. शारीरिक अत्याचार करण्याच्या प्रयत्नात असतानाच मुलीने आरडा-ओरडा केल्याने विनयभंग करुन तो पळाला होता. नंतरमात्र त्याची वाच्यता न झाल्याने हा नराधम सोकावला. त्याला विकृतीने पछाडले. यावेळी त्याने परिसिमाच गाठली आणि त्या अल्पवयीन मुलीवर त्याने अत्याचार केला, असे पोलिसांनी सांगितले.
पोलिसांनी घडविली अद्दल -
प्रकरण मिटवण्यासाठी संशयिताने केलेल्या कृत्यास पाठीशी घालत 25 हजार रुपये घेऊन गप्प बसण्यासाठी संबंधित पीडित कुटुंबीयांवर दबाव टाकत होते. ते सर्व राजकीय प्रतिष्ठीत गाव पुढारी असल्याचे सांगण्यात येते. त्यांना मेढा पोलिसांनी रेकाॅर्डवर घेत चांगलीच अद्दल घडवली. याप्रकरणी अधिक तपास वाईच्या पोलीस उपअधीक्षक डॉ. शीतल खराडे करत आहेत. मेढ्याचे सहाय्यक पोलीस निरिक्षक अमोल माने व त्यांची टीम त्यांना सहकार्य करीत आहे.
हेही वाचा - जावळीत खाऊचे आमिष दाखवून अल्पवयीन मुलीवर अत्याचार; वृद्ध आरोपी अटकेत
