बुलडाणा- मेहकर शहरातील एका सेवानिवृत्त शिक्षकाच्या घरी पाच दरोडेखोरांनी जीवे मारण्याची धमकी देऊन जवळपास साडेचार लाखांचा ऐवज लंपास केल्याची घटना घडली. या घटनेमुळे परिसरात दहशतीचे वातावरण निर्माण झाले आहे.
जीवे मारण्याची धमकी देत दरोडा
मेहकर शहरातील बालाजी नगर परिसरात सेवानिवृत्त शिक्षक वसंतराव राठोड राहतात. पहाटे तीन वाजण्याच्या सुमारात पाच अज्ञात दरोडेखोरांना घरात प्रवेश केला व घरातील मथुराबाई राठोड यांच्यासह घरातील लोकांना जीवे मारण्याची धमकी देत सोन्याचे दागिने आणि रोख रक्कम असा साडेचार लाखांचा मुद्देमाल लुटला. एवढेच नाही तर, राठोड यांच्या भाडेकरुंच्या घरातही दरोडा टाकला. सोबतच दरोडेखोरांनी पोलीस कर्मचारी अतुल पवार यांच्या गेटचे कुलूप तोडून दुचाकी वाहनही लंपास केले. या प्रकरणामुळे परिसरात भितीचे वातावरण पसरले आहे.