नवी दिल्ली Neeraj Chopra : ऑलिम्पिक विजेता नीरज चोप्रा शनिवारी (१६ सप्टेंबर) रोजी अमेरिकेत खेळल्या गेलेल्या युजीन डायमंड लीग २०२३ च्या अंतिम फेरीत ट्रॉफीचा बचाव करण्यात कमी पडला. स्पर्धेत त्यानं ८३.८० मीटर थ्रो करून दुसरं स्थान पटकावलं.
झेक प्रजासत्ताकच्या खेळाडूनं ट्रॉफी जिंकली : झेक प्रजासत्ताकच्या जेकब वडलेचनं डायमंड ट्रॉफी जिंकली. त्यानं ८४.२४ मीटरचा सर्वोत्तम थ्रो केला. तर फिनलंडच्या ऑलिव्हर हेलँडरनं ८३.७४ मीटरच्या थ्रोसह तिसरं स्थान पटकावलं. विश्वविजेता नीरज चोप्रा डायमंड ट्रॉफीचा गतविजेता होता. मात्र तो आपल्या विजेतेपदाचा बचाव करणारा केवळ तिसरा खेळाडू बनू शकला नाही. झेक प्रजासत्ताकच्या विटेझस्लाव्ह वेसेली (२०१२ आणि २०१३) आणि जेकब वडलेच (२०१६ आणि २०१७) यांनी या आधी आपल्या विजेतेपदाचा बचाव केला आहे.
नीरज नेहमीच्या लयीत दिसला नाही : अंतिम फेरीत नीरज त्याच्या नेहमीच्या लयीत दिसला नाही. त्याचे दोन प्रयत्न फाऊल झाले. त्याचे उर्वरित तीन प्रयत्नही सामान्यच राहिले. दुसरीकडे जेकब वडलेचनं पहिल्या थ्रोपासूनच आघाडी कायम राखली. नीरजनं गेल्या वर्षी सप्टेंबरमध्ये झुरिच येथं झालेल्या डायमंड लीग फायनलमध्ये विजेतेपद पटकावलं होतं.
डायमंड लीग फायनलमधील नीरज चोप्राची कामगिरी :
- पहिला प्रयत्न - फाऊल
- दुसरा प्रयत्न- ८३.८० मीटर
- तिसरा प्रयत्न- ८१.३७ मीटर
- चौथा प्रयत्न- फाऊल
- पाचवा प्रयत्न- ८०.७४ मीटर
- सहावा प्रयत्न - ८०.९० मीटर
डायमंड लीग फायनलमधील सर्व ६ खेळाडूंचे सर्वोत्तम थ्रो :
- जेकब वडलेच (झेक प्रजासत्ताक) – ८४.२४ मीटर
- नीरज चोप्रा (भारत) – ८३.८० मीटर
- ऑलिव्हर हेलँडर (फिनलंड) – ८३.७४ मीटर
- अँड्रियन मार्डारे (मोल्डोव्हा) - ८१.७९ मीटर
- कर्टिस थॉम्पसन (युनायटेड स्टेट्स ऑफ अमेरिका) - ७७.०१ मीटर
- अँडरसन पीटर्स (ग्रेनाडा) – ७४.७१ मीटर
हेही वाचा :
- Neeraj Chopra : वर्ल्ड चॅम्पियन नीरज चोप्रानं झुरिच डायमंड लीग स्पर्धेत पटकावलं दुसरं स्थान, फायनलसाठी पात्र
- Neeraj Chopra Record : 'गोल्डन बॉय' च्या गावात एकच जल्लोष! 'देशासाठी अभिमानाचा क्षण', नीरज चोप्राच्या वडिलांची प्रतिक्रिया
- Neeraj Chopra News : नीरज चोप्राची ऐतिहासक कामगिरी, जागतिक अॅथलेटिक्स चॅम्पियनशिपमध्ये सुर्वणपदक मिळविणारा ठरला पहिला भारतीय