हैदराबाद : आयपीएलच्या पंधराव्या हंगामातील बारावा सामना लखनौ सुपरजायंट्स विरुद्ध सनरायझर्स हैदराबाद ( Lucknow Super Giants vs Sunrisers Hyderabad ) यांच्यात होणार आहे. हा सामना मुंबईतील डॉ. डी. वाय. पाटील स्टेडियमवर संध्याकाळी साडेसात वाजता सुरु होईल. आयपीएलच्या इतक्या वर्षात या दोन संघात प्रथमच सामना होत आहे. कारण लखनौ सुपरजायंट्स यंदाच्या हंगामात नव्याने सहभागी झाला आहे.
सनरायझर्स हैदराबाद संघाचे नेतृत्व केन विल्यमसनच्या ( Ken Williamson ) खांद्यावर आहे. त्याचबरोबर लखनौ सुपरजायंट्स संघाच्या नेतृत्वाची धुरा केएल राहुलच्या ( KL Rahul ) खांद्यावर आहे. या हंगामात हैदराबाद संघाचा फक्त एक सामना झाला आहे. त्या सामन्यात त्यांना राजस्थान रॉयल्सकडून दारुन पराभवाचा सामना करावा लागला होता. त्यामुळे त्यांना या सामन्यात कोणत्याही परिस्थितीत विजय मिळवणे गरजेचे आहे. लखनौ सुपरजायंट्स संघाचे आतापर्यंत दोन सामने झाले आहेत. त्यापैकी एका सामन्यात विजय तर एकात पराजय स्वीकारावा लागला आहे. त्यापैकी चेन्नई विरुद्धच्या विजयाने त्यांच्या संघात आत्मविश्वास नक्कीच वाढला आहे.
सनरायझर्स हैदराबादला ( Sunrisers Hyderabad ) पहिल्या सामन्यात बॅट आणि बॉल या दोन्ही बाबतीत चांगली कामगिरी करता आली नाही. संघाची टॉप ऑर्डर पूर्णपणे अपयशी ठरली. मधल्या फळीत एडन मार्करामच्या बॅटमधून धावा आल्या, तर वॉशिंग्टन सुंदरनेही आपल्या बॅटची ताकद दाखवून दिली. निकोलस पूरन, अभिषेक शर्मा आणि अब्दुल समद या आक्रमक फलंदाजांनी पूर्णपणे निराश केले होते. गोलंदाजीत भुवनेश्वर कुमार संघासाठी यशस्वी ठरला, इतर सर्व गोलंदाज खूप महागडे ठरले आणि त्यांना विकेटही घेता आली नाही. या सामन्यात संघाला त्यांच्या नो-बॉलच्या समस्येकडेही लक्ष द्यावे लागणार आहे, अन्यथा त्यांना पुन्हा एकदा फटका सहन करावा लागू शकतो.