मुंबई : सुपरस्टार प्रभास आणि महेश बाबू यांच्यात २०२४मध्ये टक्कर होणार आहे. आज ९ ऑगस्ट रोजी, टॉलिवूडचा प्रिन्स महेश बाबूचा वाढदिवस असल्याने एक महत्वाची घोषणा झाली आहे. महेश बाबूचा आगामी अ‍ॅक्शन ड्रामा चित्रपट 'गुंटूर करम'च्या प्रदर्शनाची तारीख समोर आली आहे. विशेष म्हणजे प्रभास आणि दीपिका पदुकोण स्टारर पॅन इंडिया चित्रपट 'कल्की एडी २८९८' देखील याच तारखेला रूपेरी पडद्यावर प्रदर्शित होणार आहे. आता हे दोन्ही चित्रपट भारतीय बॉक्स ऑफिसवर धमाकेदार कमाई करण्यासाठी सज्ज झाले आहेत. प्रभासचा 'कल्की एडी २८९८' आणि महेश बाबूचा गुंटूर करम हा चित्रपट कधी चित्रपटगृहांमध्ये प्रदर्शित होणार आहे, हे जाणून घेऊया...
चित्रपट कधी होणार प्रदर्शित : महेश बाबूचा आगामी चित्रपट 'गुंटूर करम' चित्रपटाच्या निर्मात्यांनी महेश बाबूला वाढदिवसाच्या शुभेच्छा देऊन चित्रपटाच्या प्रदर्शनाची तारीख जाहीर केली आहे. 'गुंटूर करम' हा चित्रपट १२ जानेवारी २०२४ रोजी प्रदर्शित होत आहे. या दोन्ही चित्रपटांची क्रेझ चाहत्यांमध्ये सारखीच आहे. दरम्यान आता प्रभासच्या 'कल्की एडी '२८९८' आणि महेश बाबूच्या 'गुंटूर करम' या चित्रपटाला १२ जानेवारीला बॉक्स ऑफिसवर किती प्रतिसाद मिळतो हे पाहाणे महत्वपूर्ण ठरणार आहेत.