मुंबई Ajay Devgn : बॉलीवूड अभिनेता अजय देवगणने काही दिवसापूर्वी त्याच्या आगामीच्या चित्रपटाची घोषणा केली होती. ज्यानंतर या चित्रपटाबाबत चाहते खूप उत्सुक होते. विशेष म्हणजे या चित्रपटामध्ये तो पहिल्यांदाच आर माधवनसोबत स्क्रीन शेअर करताना दिसणार आहे. या चित्रपटामध्ये साऊथ अभिनेत्री ज्योतिका देखील मुख्य भूमिकेत दिसणार आहे. हा हॉरर थ्रिलर चित्रपट असणार आहे. दरम्यान आता या चित्रपटाबाबत अपडेट समोर येत आहे. आता अजय देवगणनं या चित्रपटाच्या प्रदर्शनाची तारीख जाहीर केली आहे. अजय देवगण, ज्योती देशपांडे, कुमार मंगत पाठक आणि अभिषेक पाठक यांनी या चित्रपटाची निर्मित केली आहे.
ब्लॅक मॅजिकची चर्चा :आधी अजयच्या आगामी चित्रपटाचं नाव 'ब्लॅक मॅजिक' असल्याची चर्चा होती. मात्र, या चित्रपटाचं नाव अद्याप निश्चित झालेलं नाही. या चित्रपटाचं दिग्दर्शन विकास बहल यांनी केलं आहे. यापूर्वी 'सुपर 30', 'क्वीन आणि 'गुडबाय' सारख्या चित्रपटांसाठी त्यांनी काम केलं आहे. या चित्रपटाद्वारे ज्योतिका ही 25 वर्षांच्या विश्रांतीनंतर हिंदी चित्रपटसृष्टीत परत येत आहे. तिचा शेवटचा हिंदी चित्रपट 1997 मध्ये प्रियदर्शन दिग्दर्शित 'डोली सजा के रखना' हा होता. या चित्रपटाद्वारे तिने बॉलिवूडमध्ये पदार्पण केलं होतं. 'डोली सजा के रखना'मध्ये तिच्यासोबत अक्षय खन्ना मुख्य भूमिकेत होता. या चित्रपटामधील गाणं प्रचंड हिट झालं होतं.