मुंबई - मुंबई महानगरपालिकेतर्फे ट्रॉम्बे उच्चस्तरीय जलाशयातील इनलेट्स व्हॉल्व्ह बदलण्याचे काम गुरुवारी, २७ जानेवारी रोजी सकाळी १० वाजेपासून हाती घेण्यात येणार आहे. हे काम २८ जानेवारी रोजी शुक्रवारी पहाटे ४ वाजेपर्यंत पूर्ण होणार आहे. या कालावधीत म्हणजे गुरुवारी सकाळी १० वाजेपासून शुक्रवारी पहाटे ४ वाजेपर्यंत एम पूर्व आणि एम पश्चिम म्हणजेच चेंबूर, मानखुर्द गोवंडी आदी विभागांतील पाणीपुरवठा १८ तासांसाठी पूर्णपणे बंद राहणार आहे अशी माहिती पालिका प्रशासनाकडून देण्यात आली आहे.
पाण्याचा आवश्यक साठा करा -
ट्रॉम्बे उच्चस्तरीय जलाशयाचे काम पालिकेच्या जलविभाग हाती घेणार आहे. हे काम गुरुवारी, २७ जानेवारी रोजी सकाळी १० वाजेपासून दुस-या दिवशी शुक्रवारी पहाटे ४ वाजेपर्यंत हाती घेण्यात येणार आहे. त्यामुळे या कालावधीत या भागातील पाणी पुरवठ्यावर परिणाम होणार आहे. चेंबूर, गोवंडी तसेच मानखुर्द परिसरात पाणीकपातीपूर्वी अगोदरच्या दिवशी खबरदारीचा उपाय म्हणून पाण्याचा आवश्यक साठा करुन ठेवावा. तसेच, कपातीच्या कालावधीत काटकसरीने पाणी वापरुन सहकार्य करावे, असे आवाहन मुंबई महानगरपालिकेने रहिवाशांना केले आहे.